പാലക്കാട്: 1976ലാണ് കുഞ്ചന്‍ നമ്പ്യാര്‍ ജനിച്ച കലക്കത്തുഭവനവും അതോടനുബന്ധിച്ച 56സെന്റ് സ്ഥലവും കേരള സര്‍ക്കാര്‍ സാംസ്‌കാരികവകുപ്പിന്റെ കീഴിലുള്ള ഒരു സാംസ്‌കാരിക കേന്ദ്രമാക്കിയത്. ഇതിനുശേഷം ഇവിടത്തെ ഭരണസമിതിയെയും നിയമിക്കുന്നതും സര്‍ക്കാരാണ്. ഇവിടെ അധ്യാപകരുള്‍പ്പെടെ പത്തിനൊന്ന് ജീവനക്കാരും 150ഓളം വിദ്യാര്‍ഥികളും ഉണ്ട്. ഇവര്‍ക്ക് ശമ്പളം നല്‍കുന്നതും കേരള സര്‍ക്കാരാണ്. ഈ സ്മാരകത്തില്‍ ഓട്ടന്‍തുള്ളല്‍, മോഹിനിയാട്ടം, കര്‍ണാടക സംഗീതം, മൃദംഗം എന്നവ പഠിപ്പിക്കുന്നു. കേരള കലാമണ്ഡലം കല്‍പിത സര്‍വകലാശാലയുടെ മേല്‍നോട്ടത്തിലാണ് നടത്തിവരുന്നത്.
    മഹാകവി കുഞ്ചന്‍ നമ്പ്യാരുടെ സ്മാരകാഘോഷം എന്ന നിലയില്‍ കേരളത്തില്‍ മെയ് അഞ്ചിന് കുഞ്ചന്‍ ദിനം ആഘോഷിക്കുന്നു. 1957 മെയ് അഞ്ചിനാണ് ആദ്യത്തെ കുഞ്ചന്‍ ദിനം ആഘോഷിച്ചത്. ഇതോടനുബന്ധിച്ച് കേരളത്തിലെ പ്രശസ്തരായ തുള്ളല്‍ കലാകാരന്മാരില്‍ ഒരാളെ ആദരിക്കുന്ന ചടങ്ങുമുണ്ട്. 10,001രൂപയും, ബഹുമതി പത്രവും, പ്രശംസാഫലകവും നല്‍കിയാണ് ആദരിക്കപ്പെടുന്നത്. ഈ വര്‍ഷത്തെ കുഞ്ചന്‍ ദിനാഘോഷം  മെയ് നാലുമുതല്‍ ആറുവരെ അതിഗംഭീരമായി  ആഘോഷിക്കുന്നു.
    1976ല്‍ ദേശീയ സ്മാരകമാക്കിയെങ്കിലും കലക്കത്തുഭവനവും, പത്തായപ്പുരയും, സര്‍പ്പകാവും, പടിപ്പുരയും സര്‍ക്കാര്‍ ഏറ്റെടുത്തു നടത്തുവാന്‍ തുടങ്ങിയത് 1981 മുതല്‍ക്കാണ്. 1995ല്‍ സ്മൃതി മണ്ഡപവും, 2002ല്‍ കളിത്തട്ടും, 2008ല്‍ കലാപീഠവും കുഞ്ചന്‍ സ്മാരകാഘോഷത്തോടനുബന്ധിച്ച് ഇവിടെ സ്ഥാപിച്ചിട്ടുണ്ട്. ഈ സ്മാരകത്തിന് തൊട്ടടുത്തായി കുഞ്ചന്‍ നമ്പ്യാരുടെ ഓര്‍മക്കായി സ്ഥാപിച്ച കുഞ്ചന്‍ സ്മാരക വായനശാല എന്ന ഒരു വായനശാലയും ഉണ്ട്. 20,000ത്തോളം പുസ്തകം ഈ വായനശാലയുടെ തനതു സ്വത്താണ്. 1996-97ല്‍ നിര്‍മിച്ച ഓഡിറ്റോറിയം, ഗ്രന്ഥശാലയുടെ പുതിയ കെട്ടിടം, പുതിയ ബ്ലോക്ക് കെട്ടിടം തുടങ്ങിയവ വായനശാലയുടെ ഇന്നു കാണുന്ന ആസ്തികളാണ്. പുതിയ ഭരണസമിതി അധികാരമേറ്റത്തോടെ വൈവിധ്യമാര്‍ന്ന പദ്ധതികള്‍ നടപ്പിലാക്കി വരുകയാണെന്നും ഈ വര്‍ഷത്തെ പുതിയ പദ്ധതികള്‍ കുഞ്ചന്‍ ദിനാഘോഷത്തില്‍ പ്രഖ്യാപ്പിക്കുമെന്നും അധികൃതര്‍ അറിയിച്ചു.