കൊച്ചി: ബിഷപ്പ് ഫ്രാങ്കോയ്‌ക്കെതിരായ പീഡനക്കേസില്‍ കുറ്റപത്രം വൈകുന്നതിനെതിരെ തുടര്‍ന്ന് സേവ് അവര്‍ സിസ്റ്റേഴ്‌സ് ആക്ഷന്‍ കൗണ്‍സിലിന്റെ (എസ്.ഒ.എസ്) നേതൃത്വത്തില്‍ ഇന്ന് കൊച്ചിയില്‍ സമരപ്രഖ്യാപന കണ്‍വെന്‍ഷന്‍ നടക്കും. കഴിഞ്ഞദിവസം ചേര്‍ന്ന ആക്ഷന്‍ കൗണ്‍സില്‍ യോഗത്തിലാണ് സമരപ്രഖ്യാപന കണ്‍വെന്‍ഷന്‍ നടത്താന്‍ തീരുമാനിച്ചത്. രണ്ടാഴ്ച മുന്‍പ് കന്യാസ്ത്രീകള്‍ കോട്ടയം എസ്.പി ഹരിശങ്കറിനെ കണ്ട് കേസില്‍ കുറ്റപത്രം വൈകുന്നതില്‍ പ്രതിഷേധം അറിയിച്ചിരുന്നു. ഒരാഴ്ചയ്ക്കുള്ളില്‍ കുറ്റപത്രം സമര്‍പ്പിക്കാമെന്നാണ് കൂടിക്കാഴ്ചയില്‍ എസ്.പി ഉറപ്പുനല്‍കിയത്. എന്നാല്‍ ഇതുവരെയായും കുറ്റപത്രം സമര്‍പ്പിക്കാത്ത സാഹചര്യത്തിലാണ് വീണ്ടും സമരരംഗത്തേക്കിറങ്ങാന്‍ കന്യാസ്ത്രീകള്‍ തീരുമാനിച്ചത്. അനിശ്ചിതകാല സമരം നടത്താനാണ് ആക്ഷന്‍ കൗണ്‍സിലിന്റെ തീരുമാനം.
ബിഷപ്പിനെതിരേ സമരം ചെയ്ത കന്യാസ്ത്രികള്‍ക്ക് പുറമെ സമരത്തിന് ഐക്യദാര്‍ഢ്യം പ്രഖ്യാപിച്ചവര്‍ ഉള്‍പ്പടെ നൂറുകണക്കിന് പേര്‍ കണ്‍വന്‍ഷനില്‍ പങ്കെടുക്കും. കേസില്‍ കുറ്റപത്രം വൈകിക്കുന്നത് കുറ്റകൃത്യമെന്നും അന്വേഷണ സംഘത്തിനെതിരെ കേസെടുക്കണമെന്ന് ആവശ്യപ്പെട്ട് കേരള കാത്തലിക് റിഫോര്‍മേഷന്‍ മൂവ്‌മെന്റ് (കെ.സി.ആര്‍.എം)ഉം പൊലിസില്‍ പരാതി നല്‍കിയിട്ടുണ്ട്. നേരത്തെ കുറ്റപത്രം വൈകുന്നതില്‍ കുറവിലങ്ങാട് മഠത്തിലെ കന്യാസ്ത്രീകള്‍ കോട്ടയം എസ്.പിക്ക് പരാതി നല്‍കിയിരുന്നു. ഫ്രാങ്കോയുടെ അറസ്റ്റിന് ശേഷം അഞ്ച് മാസം പിന്നിട്ടിട്ടും കുറ്റപത്രം നല്‍കാത്തത് കേസിനെ ദുര്‍ബലപ്പെടുത്താന്‍ സാധ്യതയുണ്ടെന്ന് കന്യാസ്ത്രീകള്‍ അറിയിച്ചു. ബിഷപ്പ് ഫ്രാങ്കോ മുളയ്ക്കലിനെതിരായ കന്യാസ്ത്രീയുടെ ബലാത്സംഗ പരാതിയില്‍ എഫ്.ഐ.ആര്‍ രജിസ്റ്റര്‍ ചെയ്തിട്ട് എട്ട് മാസം പിന്നിട്ടു. കേസില്‍ കുറ്റപത്രം തയാറായെങ്കിലും ഇതുവരെ കോടതിയില്‍ സമര്‍പ്പിച്ചിട്ടില്ല.  കുറ്റപത്രം അകാരണമായി വൈകിക്കുന്നതിനാല്‍ ക്രമിനല്‍ നിയമപ്രകാരം അന്വേഷണ ഉദ്യോഗസ്ഥര്‍ക്കെതിരേ കേസെടുക്കണമെന്നാണ് പരാതിയിലെ ആവശ്യം. അന്വേഷണ ഉദ്യോഗസ്ഥനായ ഡിവൈ.എസ്.പി സുഭാഷ്, കോട്ടയം എസ്.പി ഹരിശങ്കര്‍ എന്നിവര്‍ക്കെതിരെ ക്രിമിനല്‍ നിയമം 173 എ പ്രകാരം കേസെടുക്കണമെന്നാണ് ആവശ്യം. ബലാത്സംഗ പരാതിയില്‍ കുറ്റപത്രം വൈകിക്കുന്നത് ക്രിമിനല്‍ കുറ്റമാണെന്ന് പരാതി ചൂണ്ടിക്കാട്ടുന്നു.
അനിശ്ചിതകാല സമരത്തിലേക്ക് കടക്കാനാണ് സമരസമിതിയുടെ തീരുമാനം. കേസ് അട്ടിമറിക്കാനും സാക്ഷികളെ സമ്മര്‍ദത്തിലാക്കാനും ശക്തമായ ശ്രമങ്ങളാണ് നടക്കുന്നതെന്നാണ് ആക്ഷന്‍ കൗണ്‍സിലിന്റെ ആരോപണം. കഴിഞ്ഞ വര്‍ഷം സെപ്റ്റംബര്‍ 21 നാണ് കോട്ടയം എസ്.പിക്ക് ലഭിച്ച പരാതിയിന്മേല്‍ ജലന്ധര്‍ ബിഷപ്പ് ആയിരുന്ന ഫ്രാങ്കോ മുളക്കലിനെ പൊലിസ് അറസ്റ്റ് ചെയ്തത്. റിമാന്‍ഡ് ഉള്‍പ്പെടെ 25 ദിവസം ജയില്‍വാസം അനുഭവിച്ച ഫ്രാങ്കോ ഒക്‌റ്റോബര്‍ 16ന് ജാമ്യത്തിലിറങ്ങി. അറസ്റ്റിനുശേഷം അഞ്ചരമാസം പിന്നിട്ടിട്ടും കേസില്‍ ഇതുവരെയും നല്‍കിയില്ല. പബ്ലിക് പ്രോസിക്യൂട്ടറെ നിയമിച്ച് രണ്ടുമാസം കഴിഞ്ഞിട്ടും കുറ്റപത്രം സമര്‍പ്പിക്കാത്തതിനെ തുടര്‍ന്നാണ് കന്യാസ്ത്രീകള്‍ പരാതിയുമായി രംഗത്തെത്തിയത്. ഡി.ജി.പിയുടെ അനുമതി ലഭിച്ചാല്‍ ഉടന്‍ കുറ്റപത്രം സമര്‍പ്പിക്കുമെന്ന് കോട്ടയം എസ്.പി ഹരിശങ്കര്‍ അറിയിച്ചു.