കൊച്ചി: ഐ.എം.എ കൊച്ചിയുടെ നേതൃത്വത്തില്‍ ലോകാരോഗ്യദിനമായ നാളെ കൊച്ചി മാരത്തണ്‍ സംഘടിപ്പിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. കൊതുക് രഹിത കൊച്ചി എന്ന ആശയത്തിലൂന്നിയാണ് മാരത്തണ്‍ സംഘടിപ്പിക്കുന്നത്. പത്ത്, അഞ്ച് കിലോമീറ്റര്‍ വിഭാഗങ്ങളിലാണ് മാരത്തണ്‍ നടക്കുന്നത്. പത്ത് കിലോമീറ്ററില്‍ ഒന്നാം സ്ഥാനം ലഭിക്കുന്ന വ്യക്തിക്ക് 10000 രൂപയും രണ്ടാം സ്ഥാനം ലഭിക്കുന്ന വ്യക്തിക്ക് 5000 രൂപയും അഞ്ചുകിലോമീറ്ററില്‍ ഒന്നാം സ്ഥാനം 8000 രൂപയും രണ്ടാം സ്ഥാനം 4000 രൂപയും ലഭിക്കും. 14 പീക്‌സിന്റെ സഹകരണത്തോടെ സംഘടിപ്പിക്കുന്ന മാരത്തണില്‍ ഫിനിഷ് ചെയ്യുന്ന എല്ലാവര്‍ക്കും മെഡല്‍ ലഭിക്കും. സുംബ ഡാന്‍സിന്റെ അകമ്പടിയോടെ വാം അപ്പും സംഘടിപ്പിച്ചിട്ടുണ്ട്. സ്‌പോട്ട് രജിസ്‌ട്രേഷനുണ്ടായിരിക്കും. 300 രൂപയാണ് രജിസ്‌ട്രേഷന്‍ ഫീസ്. വാര്‍ത്താസമ്മേളനത്തില്‍ ഐ.എം.എ സ്‌പോര്‍ട്്‌സ് വിങ് കണ്‍വീനര്‍ ഡോ.വിനോദ് പദ്മനാഭന്‍, പ്രസിഡന്റ് ഡോ. എം.ഐ ജുനൈദ് റഹ്മാന്‍ എന്നിവര്‍ പങ്കെടുത്തു.