തിരുവനന്തപുരം: പി.എസ്.സി പരീക്ഷയില്‍ സുപ്രീംകോടതി വിധിക്ക് ശേഷം ശബരിമല ദര്‍ശനം നടത്തിയ ആദ്യ യുവതികള്‍ ആരാണെന്ന ചോദ്യം ചോദിച്ച് പുലിവാല് പിടിച്ച് പി.എസ്.സി. ചോദ്യത്തിനെതിരെ വ്യാപകമായപ്രതിഷേധമാണ് ഉയര്‍ന്നിരിക്കുന്നത്. ആരോഗ്യ വകുപ്പിന് കീഴിലെ അസിസ്റ്റന്റ് പ്രൊഫസര്‍ തസ്തികയിലേക്ക് മാര്‍ച്ച് മൂന്നിന് നടത്തിയ പരീക്ഷയിലാണ് ശബരിമലയെക്കുറിച്ചുള്ള ചോദ്യം ഉള്‍പ്പെടുത്തിയത്. ഇതിന് ഉത്തരമായി സൂചിപ്പിച്ചിരിക്കുന്നത് ബിന്ദുവും കനക ദുര്‍ഗയെയുമാണ്.
ഇതിനെതിരേയാണ് പ്രതിഷേധമുയര്‍ന്നത്. ചോദ്യം വിശ്വാസികളെ വ്രണപ്പെടുത്തുന്നതാണെന്ന് പന്തളം കൊട്ടാരം പ്രതിനിധികള്‍ വിമര്‍ശിച്ചു. ശബരിമല സ്ത്രീ പ്രവേശനം മറന്ന് തുടങ്ങിയ ഭക്തരെ അത് വീണ്ടും ഓര്‍മിപ്പിച്ച് വികാരം വ്രണപ്പെടുത്താനുള്ള ശ്രമമാണ് നടന്നതെന്നുമായിരുന്നു വിമര്‍ശനം.
എന്നാല്‍ ശബരിമല യുവതി ദര്‍ശന ചോദ്യം ഉദ്യോഗാര്‍ഥികള്‍ പരാതിപ്പെട്ടാല്‍ പരിശോധിക്കുമെന്നാണ് പി.എസ്.സി ചെയര്‍മാന്‍ എം.കെ സക്കീറിന്റെ പ്രതികരണം. പൊതു വിജ്ഞാന രംഗത്ത് നിന്നുള്ള ചോദ്യമായിരുന്നതെന്നും ഇതുവരെ ആരും പരാതിപ്പെട്ടില്ലെന്നുമാണ് അദ്ദേഹം പറയുന്നത്.