തളിപ്പറമ്പ്: തളിപ്പറമ്പ് താലൂക്ക് ആശുപത്രിയില്‍ ഗര്‍ഭിണിക്ക് മതിയായ ചികിത്സ നല്‍കിയില്ലെന്ന് ആരോപണം. യുവതിയുടെ ബന്ധുക്കളാണ് ആരോപണവുമായി രംഗത്തെത്തിയത്. ഇരിട്ടി ഉളിക്കല്‍ മണിപ്പാറയില്‍ കുഞ്ഞഹമ്മദിന്റെ മകള്‍ റൗഫത്തിനാണ് തളിപ്പറമ്പ് താലൂക്ക് ആശുപത്രിയില്‍ ചികിത്സ നിഷേധിക്കപ്പെട്ടത്.
പ്രസവത്തിനായി ഡോക്ടറുടെ നിര്‍ദേശ പ്രകാരം യുവതിയെ വ്യാഴാഴ്ച ആശുപത്രിയില്‍ പ്രവേശിക്കുകയും ഇന്നലെ ശസ്ത്രക്രിയ ഉണ്ടാവുമെന്നായിരുന്നു ഡോക്ടര്‍ അറിയിച്ചിരുന്നത്. തുടര്‍ന്ന് രാവിലെ ഓപ്പറേഷന്‍ തിയറ്ററില്‍ കയറ്റി. എന്നാല്‍ ഉച്ചയായിട്ടും ശസ്ത്രക്രിയ നടത്തിയില്ല. വൈകിയതിനെ തുടര്‍ന്നു യുവതിയുടെ ഭര്‍ത്താവ് അലിയാറും ബന്ധുക്കളും അന്വേഷിച്ചപ്പോള്‍ ശസ്ത്രക്രിയ ഇന്നലെ നടത്താനാവില്ലെന്ന മറുപടിയാണു ലഭിച്ചതെന്നു യുവതിയുടെ പിതാവ് പറഞ്ഞു. ശസ്ത്രക്രിയക്കു തിങ്കളാഴ്ച വരെ കാത്തിരിക്കണമെന്ന് ആശുപത്രി അധികൃതര്‍ പറഞ്ഞതായും ബന്ധുക്കള്‍ ആരോപിക്കുന്നു. അനസ്‌തേഷ്യയുടെ റിപ്പോര്‍ട്ട് കിട്ടിയിട്ടില്ലെന്ന കാരണമാണ് അധികൃതര്‍ പറഞ്ഞത്. എന്നാല്‍, യുവതിയുടെ വയര്‍ കഴുകിയതിനു ശേഷം ശസ്ത്രക്രിയ നടത്താനാവില്ലെന്ന് ആശുപത്രി അധികൃതര്‍ പറഞ്ഞതോടെ ബന്ധുക്കള്‍ പ്രതിഷേധിച്ചു. സംഭവത്തെ തുടര്‍ന്ന് ബന്ധുക്കള്‍ തുടര്‍ചികിത്സക്കായി ഇരിട്ടിയിലെ സ്വകാര്യ ആശുപത്രിയില്‍ എത്തിച്ച യുവതി വൈകിട്ട് പെണ്‍കുഞ്ഞിന് ജന്മം നല്‍കി.