തിരുവനന്തപുരം: സഭ്യതയുടെയും സാമാന്യ മര്യാദയുടേയും സര്‍വസീമകളും ലംഘിച്ച മന്ത്രി എം.എം മണി ദേവികുളം സബ് കലക്ടര്‍ക്കെതിരേ നടത്തിയ പരാമര്‍ശം മന്ത്രിസഭക്കും ജനങ്ങള്‍ക്കും അപമാനകരമാണെന്നും ഇതുപോലൊരു മന്ത്രി കേരളത്തില്‍ ഉണ്ടല്ലോയെന്നോര്‍ത്ത് നാടു ലജ്ജിക്കേണ്ട അവസ്ഥയാണെന്നും മുന്‍ കെ.പി.സി.സി പ്രസിഡന്റ് വി.എം സുധീരന്‍.
നിയമവ്യവസ്ഥയെത്തന്നെ വെല്ലുവിളിച്ചു മുന്നോട്ടു പോകുന്ന കൈയേറ്റമാഫിയയെ രക്ഷിക്കാനാണ് ഈ വെപ്രാളം. മണിയുമായി ആലോചിച്ചേ കൈയേറ്റക്കാര്‍ക്കെതിരേ നടപടി സ്വീകരിക്കാവൂയെന്ന മുഖ്യമന്ത്രിയുടെ നിര്‍ദേശം മുഖ്യമന്ത്രിയും സി.പി.എം നേതൃത്വവും കൈയേറ്റലോബിക്ക് ഒപ്പമാണെന്ന സന്ദേശമാണ് നല്‍കുന്നത്. നിയമലംഘകരായ കൈയേറ്റക്കാരെ ഒഴിപ്പിക്കണമെന്ന ശക്തമായ ജനവികാരമാണ് ഉയര്‍ന്നുവന്നിട്ടുള്ളത്. ഇതില്‍നിന്നും ജനശ്രദ്ധ തിരിക്കുന്നതിനാണു പിണറായി-മണി കൂട്ടുകെട്ട് ഇപ്പോള്‍ വര്‍ഗീയവികാരം ഇളക്കിവിട്ട് രാഷ്ട്രീയതര്‍ക്കങ്ങള്‍ ഉണ്ടാക്കുന്നത്. എതിര്‍പ്പുകളെ അവഗണിച്ച് കൈയേറ്റ മാഫിയയില്‍ നിന്നും നാടിനെ രക്ഷിക്കുന്നതിന് ജനതാല്‍പ്പര്യം മുന്‍നിര്‍ത്തിയുള്ള നടപടികളുമായി റവന്യു മന്ത്രി മുന്നോട്ട് പോകണം. അതിനുള്ള ഇച്ഛാശക്തിയാണ് മന്ത്രിയില്‍നിന്നു പ്രതീക്ഷിക്കുന്നതെന്നും അദ്ദേഹം ഫേസ്ബുക്കില്‍ കുറിച്ചു.
സമനില നഷ്ടപ്പെട്ടയാളെപ്പോലെയാണ് മന്ത്രി മണിയുടെ പെരുമാറ്റവും പ്രതികരണങ്ങളും. ഭ്രാന്തന്‍ അഭിപ്രായപ്രകടനമാണ് അദ്ദേഹം നടത്തിവരുന്നത്. പെമ്പിളൈ ഒരുമൈയേയും അതില്‍ പങ്കാളികളായ സ്ത്രീകളെയും അടച്ചാക്ഷേപിച്ചു. മണിയുടെ നടപടി സ്ത്രീത്വത്തെ അപമാനിക്കുന്നതാണ്. സ്ത്രീസമൂഹത്തിന് അപമാനകരമായ അധിക്ഷേപങ്ങള്‍ നടത്തിയ മണിക്കെതിരേ ക്രിമിനല്‍ കേസെടുക്കണം. മണിയുടെ അഭിപ്രായം ശരിയല്ലെന്നു മാത്രം പറഞ്ഞു പ്രശ്‌നത്തെ ലഘൂകരിക്കാനാണ് മുഖ്യമന്ത്രി ശ്രമിക്കുന്നത്. അദ്ദേഹം പറഞ്ഞു.