തിരുവനന്തപുരം: അന്യസംസ്ഥാന പച്ചക്കറി വിതരണം ചെയ്തതു കണ്ടെത്തിയതിനെത്തുടര്‍ന്ന് സസ്‌പെന്‍ഷനിലായ ഹോര്‍ട്ടികോര്‍പ്പ് എം.ഡി സുരേഷ് കുമാര്‍ വിശദീകരണം നല്‍കിയതും വിവാദമാകുന്നു. പത്ര പരസ്യത്തിലൂടെ വിശദീകരണം നല്‍കിയതാണ് കൃഷി വകുപ്പില്‍ വീണ്ടും പുകച്ചിലുണ്ടാക്കുന്നത്. ഇക്കാര്യം പരിശോധിച്ച് നടപടിയെടുക്കുമെന്നു പറഞ്ഞ് കൃഷിമന്ത്രി വി.എസ് സുനില്‍കുമാര്‍ ഇതിനകം രംഗത്തെത്തി.

ആനയറ വേള്‍ഡ് മാര്‍ക്കറ്റിലെ ഹോര്‍ട്ടികോര്‍പ്പ് കേന്ദ്രത്തില്‍ കൃഷിവകുപ്പ് മന്ത്രി വി.എസ് സുനില്‍കുമാര്‍ മിന്നല്‍ സന്ദര്‍ശനം നടത്തിയിരുന്നു. അന്യസംസ്ഥാന പച്ചക്കറി വില്‍പ്പന നടത്തിയെന്നു കാട്ടി മന്ത്രി എം.ഡിയെ സസ്‌പെന്‍ഡും ചെയ്തു. ഇതേതുടര്‍ന്നാണ് എം.ഡിയുടെ വിശദീകരണം അടങ്ങിയ പത്രപരസ്യം.

തന്റെ ആത്മാഭിമാനം നഷ്ടമാകാതിരിക്കാനാണ് പത്രപരസ്യം നല്‍കുന്നതെന്നാണ് അദ്ദേഹത്തിന്റെ നിലപാട്. റമദാന്‍ അവധിയായതിനാല്‍ കര്‍ഷകരില്‍ നിന്നും പച്ചക്കറികള്‍ ലഭിച്ചില്ല. നിരവധി കേന്ദ്രങ്ങളില്‍ ഹോര്‍ട്ടികോര്‍പ്പിന് പച്ചക്കറി നല്‍കാന്‍ സാധിക്കാതെ വരുമെന്ന സാഹചര്യം ഉണ്ടായി. അതിനാലാണ് തമിഴ്‌നാട്ടില്‍ നിന്നും പച്ചക്കറികള്‍ വാങ്ങിയതെന്ന് വിശദീകരണ പരസ്യത്തില്‍ പറയുന്നു.