വടകര: കാലിക്കറ്റ് സര്‍കലാശാല ബി.സോണ്‍ കലോത്സവത്തില്‍ 73 ഇനങ്ങള്‍ പൂര്‍ത്തിയായപ്പോള്‍ 246 പോയിന്റുമായി ഫാറൂഖ് കോളജ് മുന്നേറുന്നു.
രണ്ടാം സ്ഥാനത്തുള്ള സെന്റ് ജോസഫ് ദേവഗിരിക്ക് 170 പോയിന്റാണുള്ളത്. 50 പോയിന്റ് നേടി ഗവ. ലോ കോളജാണ് മൂന്നാം സ്ഥാനത്ത്. 47 പോയിന്റോടെ പ്രൊവിഡന്‍സ് കോളജ് നാലാം സ്ഥാനത്ത് തുടരുന്നു.
കലോത്സവത്തിന്റെ രണ്ടാം ദിവസമായ ഇന്നലെ അഞ്ചു വേദികളിലും നേരത്തെ നിശ്ചയിച്ച പ്രകാരം മത്സരങ്ങള്‍ തുടങ്ങി. ദഫ്മുട്ട്, അറബനമുട്ട്, വിവിധ വിഭാഗങ്ങളിലുള്ള നാടോടി നൃത്തങ്ങള്‍,  മോഹിനിയാട്ടം എന്നിവയാണ് പ്രധാന വേദിയായ എം.യു.എം ഗ്രൗണ്ടില്‍ നടന്നത്. വലിയ ജനാവലി നാടോടി നൃത്തം കാണാനെത്തി. തൊട്ടടുത്ത രണ്ടാം വേദിയും സൂചികുത്താനിടമില്ലാത്ത വിധം നിറഞ്ഞിരുന്നു. ഉച്ചയോടെ നടന്ന കോല്‍ക്കളി മത്സരം കാണാന്‍ സ്ത്രീകളും കുട്ടികളുമടക്കം വലിയ ജനാവലിയാണെത്തിയത്.
മേളയുടെ സമാപന ദിവസമായ ഇന്ന് ഒന്നും രണ്ടും മൂന്നും വേദികളില്‍ മാത്രമാണ് മത്സരങ്ങള്‍ നടക്കുക. വൈകിട്ട് ആറിന് സമാപന സമ്മേളനം നടക്കും.