അന്തിക്കാട്: അരക്കോടിയോളം രൂപ ചെലവഴിച്ചു കെട്ടിടമൊരുക്കിയിട്ടും ആവശ്യമായ സൗകര്യങ്ങളില്ലാത്തതിന്റെ പേരില്‍ പ്രവര്‍ത്തനം തുടങ്ങാനാകാതെ അന്തിക്കാട് സബ് രജിസ്ട്രാര്‍ ഓഫിസ്.
നാട്ടിക എം.എല്‍.എ ഗീതാ ഗോപിയുടെ പ്രാദേശിക വികസനഫണ്ടില്‍ നിന്നനുവദിച്ച 50 ലക്ഷം രൂപ ചെലവഴിച്ചാണു സബ് രജിസ്ട്രാര്‍ ഓഫിസിനു പുതിയ കെട്ടിടം നിര്‍മിച്ചത്. 2016 സെപ്റ്റംബറില്‍ പൊതുമരാമത്തുവകുപ്പിന്റെ നേതൃത്വത്തിലായിരുന്നു നിര്‍മാണം. കഴിഞ്ഞ ഡിസംബറില്‍ നിര്‍മാണം പൂര്‍ത്തിയാക്കിയ കെട്ടിടം കൈമാറിയപ്പോഴാണു രജിസ്‌ട്രേഷന്‍ വകുപ്പ് നിര്‍ദേശിച്ച സൗകര്യങ്ങള്‍ കെട്ടിടത്തനില്ലെന്നു കണ്ടെത്തിയത്. രേഖകള്‍ സൂക്ഷിക്കുന്നതിനു പ്രത്യേകം മുറിയുള്‍പ്പെടെയുള്ള ഇരുനിലക്കെട്ടിടമാണു രജിസ്‌ട്രേഷന്‍ വകുപ്പ് നിര്‍ദേശിച്ചിരുന്നതെങ്കിലും ഇവയൊന്നും ഇല്ലാത്ത ഒരുനിലക്കെട്ടിടമാണു പൊതുമരാമത്തുവകുപ്പ് നിര്‍മിച്ചു നല്‍കിയതെന്നാണു രജിസ്‌ട്രേഷന്‍ വകുപ്പധികൃതര്‍ പറയുന്നത്.
പുതിയ കെട്ടിടത്തില്‍ പ്രവര്‍ത്തനമാരംഭിക്കണമെങ്കില്‍ ഇനി 20 ലക്ഷം രൂപ കൂടി ചെലവഴിക്കണം. ഇത് ആരു നല്‍കുമെന്ന കാര്യത്തില്‍ ഇനിയും തീരുമാനമായിട്ടില്ല. നിലവിലെ ഓഫിസ് കെട്ടിടം പൊളിച്ചുമാറ്റിയതോടെ അന്തിക്കാട് ചെത്തുതൊഴിലാളി സഹകരണസംഘത്തിന്റെ മുകളിലത്തെ നിലയിലാണു ഇപ്പോള്‍ ഓഫിസ് പ്രവര്‍ത്തിക്കുന്നത്. വാടകയിനത്തില്‍ നല്ലൊരു തുക ഇതിനായി ചെലവാക്കുന്നതിനൊപ്പം പ്രായം ചെന്നവര്‍ക്കു ഓഫിസില്‍ എത്തിപ്പെടുന്നതിനു പ്രയാസവും നേരിടുന്നുണ്ട്.അന്തിക്കാട്, ചാഴൂര്‍, താന്ന്യം, മണലൂര്‍ എന്നിവിടങ്ങളിലെ 10 വില്ലേജുകള്‍ ഉള്‍പ്പെടുന്നതാണു അന്തിക്കാട് സബ് രജിസ്ട്രാര്‍ ഓഫിസിന്റെ പ്രവര്‍ത്തനപരിധി. നേരത്തെ തിരുകൊച്ചി സംസ്ഥാനത്തിനു കീഴില്‍ ഏനമ്മാവ് ജില്ലാ രജിസ്ട്രാര്‍ ഓഫിസ് എന്ന പേരില്‍ അറിയപ്പെട്ടിരുന്ന ഇത് കേരള സംസ്ഥാനം രൂപവല്‍കരിച്ച ശേഷമാണു അന്തിക്കാട് സബ് രജിസ്ട്രാര്‍ ഓഫിസായി മാറിയത്.