ന്യൂഡല്‍ഹി: ഇന്ത്യന്‍ ബോക്‌സര്‍മാര്‍ക്ക്  റിയോ ഒളിംപിക്‌സില്‍ ദേശീയ പതാകയെ പ്രതിനിധീകരിച്ച് മത്സരിക്കാന്‍ അനുമതി. ശിവ് ഥാപ്പ, മനോജ് കുമാര്‍, വികാസ് കുമാര്‍ എന്നിവര്‍ക്കാണ് അനുമതി ലഭിച്ചത്.
നേരത്തെ ലോക ബോക്‌സിങ് ഗവേണിങ് ബോഡി തര്‍ക്കങ്ങള്‍ കാരണം  ദേശീയ ബോക്‌സിങ് ഫെഡറേഷനെ സസ്‌പെന്‍ഡ് ചെയ്തിരുന്നു. ഇതോടെ ഇന്ത്യന്‍ പതാകയെ പ്രതിനിധീകരിച്ച് ബോക്‌സര്‍മാര്‍ക്ക് ഒളിംപിക്‌സില്‍ പങ്കെടുക്കാന്‍ സാധിക്കില്ലായിരുന്നു.
തെരഞ്ഞെടുപ്പ് സംബന്ധിച്ച തര്‍ക്കങ്ങളും സംഘടനയ്ക്കുള്ളിലെ അച്ചടക്കമില്ലായ്മയും കാരണമാണ് ദേശീയ ഫെഡറേഷനെ അന്താരാഷ്ട്ര ബോക്‌സിങ് ഫെഡറേഷന്‍ വിലക്കിയത്. തുടര്‍ന്ന് അഡ്‌ഹോക്ക് പാനലായിരുന്നു താരങ്ങളുടേയും സംഘടനയുടെയും ദൈനംദിന കാര്യങ്ങള്‍ നടത്തിയിരുന്നത്. സായ് ഡയറക്ടര്‍ ഇഞ്ചതി ശ്രീനിവാസ്, കോച്ച് ജി.എസ് സന്ധു എന്നിവരായിരുന്നു അന്താരാഷ്ട്ര മത്സരങ്ങളുടെ ടീമിനെ തെരഞ്ഞെടുത്തിരുന്നത്.
നേരത്തെ അന്താരാഷ്ട്ര കമ്മിറ്റി താരങ്ങള്‍ക്കൊപ്പം കോച്ചിങ് അംഗങ്ങള്‍ അന്താരാഷ്ട്ര മത്സരങ്ങള്‍ക്ക് വരുന്നതിനെ വിലക്കിയിരുന്നു. വിലക്ക് താരങ്ങളുടെ മാനസിക നിലയെ തകര്‍ക്കുന്നതായി ആരോപണമുണ്ടായിരുന്നു.
ഈ വിലക്കും അസോസിയേഷന്‍ നീക്കിയിട്ടുണ്ട്. നേരത്തെ ലണ്ടന്‍ ഒളിംപിക്‌സില്‍ എട്ടു ബോക്‌സര്‍മാര്‍ യോഗ്യത നേടിയിരുന്നു.
എന്നാല്‍ റിയോയില്‍ മൂന്നു ബോക്‌സര്‍മാര്‍ക്ക് മാത്രമാണ് യോഗ്യത നേടാനായത്. സംഘടനയ്ക്കുള്ളിലെ പ്രശ്‌നങ്ങള്‍ കാരണമാണിതെന്ന് വിമര്‍ശനമുയര്‍ന്നിട്ടുണ്ട്. ഇക്കാര്യം പ്രൊ ബോക്‌സിങ് താരം വിജേന്ദര്‍ സിങ് പ്രധാനമന്ത്രി നരേന്ദ്ര മോദിയുടെ ശ്രദ്ധയില്‍പ്പെടുത്തിയിട്ടുണ്ട്.
അസോസിയേഷനിലെ പ്രശ്‌നം പരിഹരിക്കാന്‍ മോദി ശക്തമായ നടപടികളെടുക്കണമെന്നാണ് വിജേന്ദറിന്റെ ആവശ്യം.