റിയാദ്: ആയുധങ്ങൾ നിറച്ച് അന്താരാഷ്‌ട്ര കപ്പൽ പാതയിൽ ആക്രമണത്തിന് ഒരുങ്ങിയ രണ്ടു ആയുധ ബോട്ടുകൾ തകർത്തതായി യമനിൽ യുദ്ധത്തിലേർപ്പെട്ട അറബ് സഖ്യ സേന അറിയിച്ചു. ഇറാൻ സഹായത്തോടെ ഹൂതികൾ തയ്യാറാക്കിയ ആയുധ ബോട്ടുകളാണ് തകർത്തത്. അന്താരാഷ്‌ട്ര കപ്പൽ പാതയെയും കപ്പൽ സഞ്ചാര മാർഗ്ഗത്തെയും ലക്ഷ്യമാക്കി തയ്യാറാക്കിയ രണ്ടു ആളില്ലാ ബോട്ടുകളാണ് (യുഎസ്‌വി) സലീൽ തുറമുഖത്തിന് തെക്ക് ഭാഗത്ത് കണ്ടത്തിയത്. കപ്പൽ സഞ്ചാര നാവിഗേഷൻ സംവിധാനം, അന്താരാഷ്ട്ര വ്യാപാരം, പ്രാദേശിക, അന്താരാഷ്ട്ര സുരക്ഷ എന്നിവക്ക് ഭീഷണി ഉയർത്തിയാണ് ഇവ തയ്യാറാക്കി വെച്ചിരുന്നതെന്ന് അറബ് സഖ്യ സേന വക്താവ് കേണൽ തുർക്കി അൽ മാലികിയെ ഉദ്ധരിച്ച് സഊദി വാർത്താ ഏജൻസി റിപ്പോർട്ട് ചെയ്‌തു.