മക്കരപറമ്പ്: വടക്കാങ്ങര ഗവ. യു.പി സ്‌കൂള്‍ കെട്ടിടത്തില്‍ വന്‍ അഗ്‌നിബാധ. സംഭവത്തില്‍ ലക്ഷങ്ങളുടെ നഷ്ടം. മക്കരപറമ്പ്  ഗ്രാമപഞ്ചായത്തിന്റെ നിയന്ത്രണത്തിലുള്ള എം.പി.ജി.യു.പി സ്‌കൂളിന്റെ രണ്ടു ക്ലാസ്മുറികളും ഫര്‍ണിച്ചര്‍ ഉരുപ്പടികളുമാണ് പൂര്‍ണമായും കത്തിനശിച്ചത്. ഇന്നലെ ഉച്ചയ്ക്കു രണ്ടോടെയായിരുന്നു സംഭവം.
കെട്ടിടത്തിന്റെ പരിസരത്തുനിന്നു പുക ഉയരുന്നതു നാട്ടുകാരുടെ ശ്രദ്ധയില്‍പെടുകയായിരുന്നു. ക്ലാസ്മുറികളില്‍ കൂട്ടിയിട്ടിരുന്ന പഴയ മര ഉരുപ്പടികള്‍ക്കാണ് തീപിടിച്ചത്. മലപ്പുറത്തുനിന്നെത്തിയ രണ്ടു യൂനിറ്റ് ഫയര്‍ഫോഴ്‌സും നാട്ടുകാരുമാണ് തീയണച്ചത്.
സ്‌കൂള്‍ അധികൃതരുടെ പരാതിയില്‍ മങ്കട പൊലിസ് കേസെടുത്തു.