പൂക്കോട്ടുംപാടം: പൊലിസിന്റെ കുഴല്‍പ്പണ വേട്ടയില്‍ 9.45 ലക്ഷത്തോളം രൂപയുടെ കുഴല്‍പ്പണവുമായി യുവാവ് പിടിയിലായി. മലപ്പുറം മൊറയൂര്‍ അരിമ്പ്ര സീനത്ത് മന്‍സില്‍ മഖൂദ്അലിയാണ് (28) പൂക്കോട്ടുംപാടം പൊലിസിന്റെ പിടിയിലായത്.
ജില്ലാ പൊലിസ് മേധാവിയുടെ നിര്‍ദേശപ്രകാരം വിദ്യാര്‍ഥികളില്‍ വാഹനങ്ങളുടെ ദുരുപയോഗം തടയുക എന്ന ലക്ഷ്യത്തോടെ പൂക്കോട്ടുംപാടം പൊലിസ് പാലാങ്കര പള്ളിക്ക് സമീപം നടത്തിയ വാഹന പരിശോധനക്കിടെയാണ് മഖൂദ്അലി പിടിയിലായത്. കരുളായി, മൂത്തേടം,എടക്കര, വഴിക്കടവ് ഭാഗങ്ങളില്‍ വിവിധ വ്യക്തികള്‍ക്ക് എത്തിക്കാനായി കൊണ്ടു പോവുകയായിരുന്ന കുഴല്‍പ്പണം.
കെ.എല്‍ 52 എ 3560 ഹേറോ ഗ്ലാമര്‍ ബൈക്കിന്റെ ടാങ്ക് കവറില്‍ അഞ്ചൂറ് രൂപയുടെ നൂറുവീതമുള്ള 18 കെട്ടുകളും, അഞ്ഞൂറ് രൂപയുടെ 90 എണ്ണമുള്ള ഒരു കെട്ടുമായി സൂക്ഷിച്ച നിലയിലായിരുന്നു പണം.
അഡീഷനല്‍ എസ്.ഐ ജോര്‍ജ് ചെറിയാന്‍, സീനിയര്‍ സിവില്‍ പൊലിസ് ഓഫിസര്‍ ബാലന്‍, സിവില്‍ പൊലിസ് ഓഫിസര്‍മാരായ സുനില്‍, മനു മാത്യു, വിനീഷ്, ഡ്രൈവര്‍ ജോണ്‍ വര്‍ഗീസ് എന്നിവരടങ്ങുന്ന സംഘമാണ് കുഴല്‍പ്പണം പിടികൂടിയത്. പ്രതിയെ കോടതിയില്‍ ഹാജരാക്കി.