ചവറ: ഗ്രാമ പഞ്ചായത്ത് ജീപ്പ് രാത്രിയില്‍ ഉപേക്ഷിച്ച നിലയില്‍ കണ്ടെത്തി. ചവറ തെക്കുംഭാഗം ഗ്രാമ പഞ്ചായത്തിന്റെ വാഹനമാണ് ഉപേക്ഷിച്ച നിലയില്‍ കണ്ടെത്തിയത്. ഇന്നലെ രാത്രി എട്ടോടെ തെക്കുംഭാഗം നടയ്ക്കാവ് ജങ്ഷന് സമീപമാണ് സംഭവം. ഔദ്യോഗിക വാഹനത്തില്‍ പഞ്ചായത്ത് പ്രസിഡന്റും ഡ്രൈവറും മദ്യപിച്ച് യാത്ര ചെയ്തുവെന്ന് ആരോപിച്ച് നാട്ടുകാരില്‍ ചിലര്‍ തടഞ്ഞിരുന്നുവെന്നും ഇതിനെ തുടര്‍ന്ന് വാഹനം റോഡില്‍ ഉപേക്ഷിച്ച ശേഷം വാഹനത്തിലുണ്ടായിരുന്നവര്‍ മുങ്ങുകയായിരുന്നുവെന്നും പൊലിസ് പറഞ്ഞു. വാഹനം പൊലിസ് കസ്റ്റഡിയില്‍ കൊണ്ടുപോകാന്‍ ശ്രമം നടത്തിയെങ്കിലു ചിലര്‍ തടഞ്ഞു. തുടര്‍ന്ന് പഞ്ചായത്ത് സെക്രട്ടറി എത്തി വാഹനം എടുത്തു കൊണ്ടുപോവുകയായിരുന്നു.