പൂക്കോട്: കേരളാ വെറ്ററിനറി യുനിവേഴ്‌സിറ്റി ദിനാഘോഷം കേരളാ ഗവര്‍ണര്‍ റിട്ട. ജസ്റ്റിസ് പി. സദാശിവം ഉദ്ഘാടനം ചെയ്തു. സര്‍വകലാശാലകള്‍ക്ക് ജനങ്ങളുമായി സൗഹൃദ ബന്ധം സ്ഥാപിക്കാന്‍ കഴിയണമെന്ന് യുനിവേഴ്‌സിറ്റി ചാനസലര്‍ കൂടിയായ ഗവര്‍ണര്‍ പി. സദാശിവം പറഞ്ഞു.
ചടങ്ങില്‍ ഗോത്രമിഷന്‍ പദ്ധതിയുടെ ഉദ്ഘാടനവും ടെക്‌നോളജി ബിസിനസ് ഇന്‍കുബേഷന്‍ പദ്ധതി ലോഞ്ചിങും കൃഷി-സംരംഭകത്വ സഹായ പുസ്തകങ്ങളുടെ പ്രകാശനവും ഗവര്‍ണര്‍ പി. സദാശിവം നിര്‍വഹിച്ചു. കുറിച്യ സമുദായത്തില്‍ നിന്നും കേരളത്തില്‍ ആദ്യമായി സിവില്‍ സര്‍വിസ് നേടിയ ശ്രീധന്യ സുരേഷിന് ഗവര്‍ണര്‍ ആശംസ അറിയിച്ചു.
കൂടാതെ മികച്ച പ്രവര്‍ത്തനം കാഴ്ചവച്ചവരേയും അവാര്‍ഡ് ജേതാക്കളെയും ഗവര്‍ണര്‍ ചടങ്ങില്‍ ആദരിച്ചു. പൂക്കോട് വെറ്ററിനറി ആന്‍ഡ് ആനിമല്‍ സയന്‍സ് യുനിവേഴ്‌സിറ്റി കബനി ഓഡിറ്റോറിയത്തില്‍ നടന്ന ചടങ്ങില്‍ വൈസ് ചാന്‍സലര്‍ ദേവേന്ദ്ര കുമാര്‍ സിങ് അധ്യക്ഷനായി. രജിസ്ട്രാര്‍ പ്രൊഫ. ജോസഫ് മാത്യൂ, വെറ്ററിനറി ആന്‍ഡ് ആനിമല്‍ സയന്‍സ് വിഭാഗം ഡീന്‍ പ്രൊഫ. സി. ലത, ഡെയറി സയന്‍സ് വിഭാഗം ഡീന്‍ പ്രൊഫ. പി. സുധീര്‍ ബാബു, ഫിനാന്‍സ് ഓഫിസര്‍ കെ.എം ശ്യാം മോഹന്‍, ഡോ.എം.കെ നാരായണന്‍ സംസാരിച്ചു.