മാനന്തവാടി: എടവക പഞ്ചായത്തിലെ തോണിച്ചാല്‍ അത്തേരിക്കുന്നില്‍ പ്രവര്‍ത്തിക്കുന്ന കരിങ്കല്‍ ക്രഷറിനെ സഹായിക്കുന്ന നിലപാടില്‍ നിന്നും പഞ്ചായത്ത് ഭരണസമിതി പിന്തിരിയണമെന്നും അല്ലാത്തപക്ഷം അനിശ്ചിതകാല സമരപരിപാടികള്‍ ആരംഭിക്കുമെന്നും ജനകീയ സമരസമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 2015-16 വര്‍ഷത്തെ പ്രവര്‍ത്തനാനുമതി ക്രഷറിന് പഞ്ചായത് അനുവദിച്ചിരുന്നില്ല.
ഇതിനെതിരെ ക്രഷറുടമ ഹൈക്കോടതിയിലും പഞ്ചായത് ട്രിബ്യൂനല്‍ മുമ്പാകെയും നല്‍കിയ ഹര്‍ജികളില്‍ ഇനിയും തീര്‍പ്പുണ്ടായിട്ടില്ല. 2016-17 വര്‍ഷത്തേക്ക് സമര്‍പ്പിച്ച ട്രേഡ് ലൈസന്‍സിലും പഞ്ചായത് സെക്രട്ടറി തീരുമാനമെടുക്കാത്തതിനെ തുടര്‍ന്ന് ഉടമ ട്രിബ്യൂനലിനെ സമീപിച്ചിരുന്നു.
പഞ്ചായത് ഭരണസമിതിക്ക് അപ്പീല്‍ സമര്‍പ്പിക്കാനും അപ്പീല്‍ തീര്‍പ്പാവുന്നത് വരെ സ്ഥാപനം പ്രവര്‍ത്തിക്കാനും ട്രിബ്യൂനല്‍ അനുമതി നല്‍കിയിരിക്കുകയാണ്.
എന്നാല്‍ മാസങ്ങള്‍ കഴിഞ്ഞിട്ടും ഭരണസമിതി അന്തിമ തീരുമാനമെടുക്കാതെ നീട്ടിക്കൊണ്ടു പോകുകയാണ് ചെയ്യുന്നത്. ക്രഷറിന്റെ ചുറ്റുവട്ടത്തുമായി ആദിവാസി കോളനിയിലുള്‍പ്പെടെ നിരവധി കുടുംബങ്ങള്‍ താമസിക്കുന്നുണ്ട്.
ക്രഷറിനാവശ്യമായ അളവില്‍ ഭൂമി ഉടമയുടെ കൈവശമില്ല. ശബദ മലിനീകരണ തോത് കൂടുതലും സ്ഥാപനത്തിലേക്കുള്ള റോഡ് ഇടുങ്ങിയതുമാണ്. ക്രഷറിനെതിരേ നിരവധി പരാതികള്‍ നിലനില്‍ക്കുന്നുണ്ട്.
ഈ സാഹചര്യത്തില്‍ ഗ്രാമ പഞ്ചായത് ഭരണസമിതി ശക്തമായ തീരുമാനമെടുക്കാതെ കാലതാമസം വരുത്തുന്നതില്‍ ദുരൂഹതയുണ്ടെന്നും ഭാരവാഹികള്‍ ആരോപിച്ചു.
പൊതു ജനതാല്‍പര്യം പരിഗണിച്ച് തീരുമാനമെടുക്കാത്ത പക്ഷം അനിശ്ചിതകാല സമരങ്ങള്‍ ആരംഭിക്കുമെന്ന് ഭാരവാഹികള്‍ മുറിയിപ്പ് നല്‍കി. എം.പി വത്സന്‍, ഷീലാ കമലാസന്‍, ജി.കെ മാധവന്‍, പ്രദീപ് കുമാര്‍, സാജന്‍, ത്രേസ്യാ മാത്യു, ലീലാ സുധാകരന്‍ തുടങ്ങിയവര്‍ വാര്‍ത്താസമ്മേളനത്തില്‍ പങ്കെടുത്തു.