ഷൊര്‍ണൂര്‍ : ഷൊര്‍ണൂര്‍ സര്‍ക്കാര്‍ ആശുപത്രിയിലെ പുരുഷവാര്‍ഡ് ഇനിയും തുറന്നില്ല. വാര്‍ഡിന്റെ അറ്റകുറ്റപണിക്കായാണ് വാര്‍ഡ് കെട്ടിടം തല്‍ക്കാലം പൂട്ടിയത്. വാര്‍ഡ് പൂട്ടിയത് മൂലം സ്ത്രീകളുടെ വാര്‍ഡിലാണ് പുരുഷന്‍മാരെ അഡ്മിറ്റ് ചെയ്ത് ചികിത്സിക്കുന്നത്. വാര്‍ഡിലേക്ക് ഒരു സാമൂഹ്യ സംഘടന കിടക്കകളും സംഭാവന ചെയ്തിട്ടുണ്ട്. കനത്ത മഴയും തണുപ്പുള്ള കാലാവസ്ഥയായതിനാല്‍ രോഗികളുടെ തിരക്ക് ക്രമാതീതമായി വര്‍ദ്ധിച്ചിട്ടുണ്ട്. സുമാര്‍ മുന്നോറോളം രോഗികളാണ് ഇവിടെ ചികിത്സതേടിയെത്തുന്നത്. അതേസമയം ഈ സാമൂഹ്യാരോഗ്യകേന്ദ്രത്തില്‍ ലാബോറട്ടറി സൗകര്യം ഉടന്‍ ആരംഭിക്കും ഇതിനായി ടെക്‌നീഷ്യനെ നിയമിച്ച് കഴിഞ്ഞു. നിലവില്‍ ആശുപത്രിയില്‍ രണ്ടുഡോക്ടര്‍മാരുടെ സേവനം മാത്രമേ ലഭിക്കുന്നുള്ളൂ. സാമൂഹ്യാരോഗ്യകേന്ദ്രത്തില്‍ ഏഴ് ഡോക്ടര്‍മാരുടെ സേവനം വേണമെന്നിരിക്കെ നാലു ഡോക്ടര്‍മാരുടെ കുറവാണുള്ളത്. ആശുപത്രിയില്‍ പ്രസവവാര്‍ഡ് നിര്‍ത്താലാക്കിയിട്ട് വര്‍ഷങ്ങള്‍ കഴിഞ്ഞെങ്കിലും പ്രസവവാര്‍ഡ് ഇനിയും ആരംഭിച്ചിട്ടില്ല. രാത്രി ഡോക്ടര്‍മാരുടെ സേവനവും ഇവിടെ ലഭിക്കുന്നില്ല.