കൊപ്പം: നടുവട്ടം രായിരനെല്ലൂര്‍ മലക്ക് സമീപം കഴിഞ്ഞദിവസം കണ്ടെത്തിയ മനുഷ്യ അസ്ഥിക്കൂടം ഇരുപത് ദിവസങ്ങള്‍ക്ക് മുന്‍പ് കാണാതായ കാടാമ്പുഴ സ്വദേശി ശശികുമാര്‍ എന്ന മണിയുടെതാണെന്ന് സംശയം. ശശികുമാറിന്റെ സഹോദരനും ബന്ധുക്കളും സംഭവസ്ഥലം സന്ദര്‍ശിച്ചിരുന്നു. ശരീര അവശിഷ്ടങ്ങളിലെ വസ്ത്രങ്ങളില്‍നിന്നും കാണാതായ വ്യക്തിയുടെതെന്ന് തോന്നിപ്പിക്കുന്ന ചില സൂചനകള്‍ ലഭിച്ചതായും അറിയുന്നു. കണ്ടെടുത്ത വസ്തുക്കളിലെ പരിശോധനയില്‍ അദ്ദേഹത്തിന്റെ ഭാര്യയും ചില സ്ഥിതീകരണങ്ങള്‍ നടത്തുകയുണ്ടായി.
പോസ്റ്റ്‌മോര്‍ട്ടം റിപ്പോര്‍ട്ടും ഡി.എന്‍.എ ടെസ്റ്റ് റിപ്പോര്‍ട്ടും പുറത്ത് വന്നാല്‍ മാത്രമേ മേല്‍പ്പറഞ്ഞ വ്യക്തിയുടേതാണോ മൃതദേഹം എന്ന് തിരിച്ചറിയുകയുള്ളൂ. മാര്‍ച്ച് 14 നാണ് ശശികുമാറിനെ കാണാതാവുന്നത്. കൊപ്പം മൊബൈല്‍ ടവര്‍ പരിധിയില്‍ അദ്ദേഹം വന്നതായുള്ള സൂചന ബന്ധുക്കള്‍ക്ക് ലഭിക്കുകയും ചെയ്തിരുന്നു. ഇതിനിടയിലാണ് കഴിഞ്ഞ ബുധനാഴ്ച്ച അസ്ഥികൂടം കണ്ടെത്തിയത്. എന്നാല്‍ പൊലിസ് സ്ഥിരീകരിച്ചിട്ടില്ല. പോസ്റ്റുമോര്‍ട്ടം റിപ്പോര്‍ട്ട് ലഭിച്ചതിന് ശേഷമേ ഇതുസംബന്ധിച്ചിട്ടുള്ള കൂടുതല്‍ വിവരങ്ങള്‍ ലഭിക്കുകയുള്ളൂ.