തിരുവനന്തപുരം: സ്വര്‍ണക്കടത്തു കേസില്‍ മുഖ്യമന്ത്രിയുടെ ഓഫിസുമായി ബന്ധപ്പെട്ട ആരോപണങ്ങള്‍ കൂടി അന്വേഷണവിധേയമാക്കണമെന്നു രമേശ് ചെന്നിത്തല. ഇക്കാര്യം ആവശ്യപ്പെട്ടു ഡി.ജി.പി ലോക്‌നാഥ് ബെഹറയ്ക്കു പ്രതിപക്ഷ നേതാവ് കത്തയച്ചു.

സംസ്ഥാന സര്‍ക്കാരിന്റെ സംവിധാനങ്ങള്‍ ഈ കേസില്‍ ദുരുപയോഗം ചെയ്തിട്ടുണ്ട്. സര്‍ക്കാരിന്റെ ഔദ്യോഗിക ചിഹ്നമുള്ള വിസിറ്റിംഗ് കാര്‍ഡ് അടിച്ചു താന്‍ സര്‍ക്കാര്‍ ഉദ്യോഗസ്ഥയാണെന്ന മട്ടില്‍ സ്വപ്ന സുരേഷ് ആളുകളെ പരിചയപ്പെട്ടു.
ഔദ്യോഗിക വാഹനങ്ങളില്‍ വിമാനത്താവളത്തില്‍നിന്നു സ്വര്‍ണം കടത്തിയെന്ന ആക്ഷേപമുണ്ട്. ഇക്കാര്യങ്ങള്‍ മുന്‍നിര്‍ത്തി കേരള പോലിസ് എഫ്.ഐ.ആര്‍ രജിസ്റ്റര്‍ ചെയ്ത് അന്വേഷണം നടത്തണമെന്നാണു ചെന്നിത്തല ആവശ്യപ്പെടുന്നത്.