കൊച്ചി: ലോഡ്ജ് മുറികളിലെ ടി.വി മോഷണം നടത്തുന്ന യുവാവിനെ പൊലിസ് അറസ്റ്റ് ചെയ്തു. ചക്കരപറമ്പില്‍ താമസിക്കുന്ന കണ്ണൂര്‍ തളിപ്പറമ്പ് പള്ളിപ്പടി സ്വദേശി അരിമറ്റം വയലില്‍ വീട്ടില്‍ അന്‍ജിത്തിനെയാണ് എറണാകുളം നോര്‍ത്ത് എസ്.ഐ വിബിന്‍ദാസും സംഘവും അറസ്റ്റ് ചെയ്തത്.
നോര്‍ത്ത് റയില്‍വെ സ്‌റ്റേഷനു സമീപത്തെ ഹാറ്റ് റസിഡന്‍സിയില്‍ നിന്ന് ടെലിവിഷന്‍ മോഷ്ടിച്ച കേസിലാണ് അറസ്റ്റ് ചെയ്തത്.
മുറിയെടുത്ത ശേഷം പുറത്തുപോയി വലിയബാഗുമായി തിരിച്ചെത്തി ടി.വിയെടുത്തു മുങ്ങുകയായിരുന്നു. മുറി തുറന്നുകിടക്കുന്നതു ശ്രദ്ധയില്‍പ്പെട്ട ലോഡ്ജ് ജീവനക്കാര്‍ മുറി പരിശോധിച്ചപ്പോഴാണ് മോഷണവിവരം പുറത്തായത്.
വ്യാജ തിരിച്ചറിയല്‍ കാര്‍ഡാണ് ലോഡ്ജില്‍ നല്‍കിയിരുന്നത്. ആലപ്പുഴ ബസ് സ്റ്റാന്‍ഡിനു സമീപം സിസില്‍ പാലസ് ലോഡ്ജിലും സമാനരീതിയില്‍ മോഷണം നടത്തിയിരുന്നു.
മോഷണ മുതലുകള്‍ പിടിച്ചെടുത്തു. നോര്‍ത്ത് സി.ഐ വൈ നിസാമുദ്ദീന്റെ നേതൃത്വത്തില്‍ കൂടുതല്‍ അന്വേഷണം ആരംഭിച്ചു.