കിന്നിംഗാര്‍: നടുവൊടിക്കും റോഡിലൂടെയുള്ള യാത്ര ഏറെ ദുഷ്‌കരം. ഒടുവില്‍ നാട്ടുകാര്‍ റോഡിലെ കുഴിയില്‍ കമുങ്ങ് പാളി നിരത്തി പാലമിട്ടു പ്രതിഷേധിച്ചു. രാഷ്ട്രീയ പാര്‍ട്ടികളുടെ സഹകരണമില്ലാതെ തുളുനാടിന്റെ അതിര്‍ത്തി പങ്കിടുന്ന മലയോര റോഡുകളുടെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് രാഷ്ട്രീയ പാര്‍ട്ടികള്‍ നടത്തിയ പല സമരങ്ങളും കണ്ടുമടുത്ത നാട്ടുകാരുടെ കൂട്ടായ്മയിലാണു വേറിട്ട സമരവുമായി മുള്ളേരിയ നാട്ടക്കല്‍ കിന്നിംഗാര്‍ പൊതുമരാമത്ത് വകുപ്പിന്റെ റോഡില്‍ പ്രതീകാത്മക പാലം പണിതു പ്രതിഷേധിച്ചത്. റോഡ് തകര്‍ന്ന് തരിപ്പണമായി വലിയ ഗര്‍ത്തങ്ങള്‍ രൂപപ്പെട്ടിട്ട് വര്‍ഷങ്ങള്‍ പിന്നിട്ടുവെങ്കിലും ജനപ്രതിനിധികള്‍ക്കോ അധികൃതര്‍ക്കോ യാതൊരു അനക്കവുമില്ലെന്ന് നാട്ടുകാര്‍ ആരോപിക്കുന്നു.
അയല്‍ സംസ്ഥാനമായ കര്‍ണാടകയിലേക്ക് കയര്‍ പദവ് വഴി ഏറ്റവും എളുപ്പത്തില്‍ എത്തിപ്പെടാന്‍ കഴിയുമെന്നത് കൊണ്ടുതന്നെ ചെറുതും വലുതുമായ വാഹനങ്ങള്‍ ആശ്രയിക്കുന്ന റോഡാണ് തകര്‍ന്ന് പാതാളക്കുഴി രൂപപ്പെട്ട് യാത്ര ദുസഹമായിട്ടുള്ളത്. റോഡിന്റെ അറ്റകുറ്റ പ്രവര്‍ത്തനങ്ങള്‍ നടത്തണമെന്നാവശ്യപ്പെട്ട് നിരവധി സമരങ്ങള്‍ നടത്തിയെങ്കിലും അധികൃതര്‍ നാളിതു വരെയായി കണ്ണു തുറന്നില്ലെന്നാണു നാട്ടുകാരുടെ പരാതി.
കഴിഞ്ഞ വര്‍ഷം മലയോര റോഡുകളുടെ ശോച്യാവസ്ഥ പരിഹരിക്കണമെന്നാവശ്യപ്പെട്ട് ജനകീയ സമരസമിതിയുടെ നേതൃത്വത്തില്‍ ബദിയഡുക്ക പൊതുമരാമത്ത് വകുപ്പ് ഓഫിസിനു മുന്നില്‍ ധര്‍ണയും ഉപരോധ സമരങ്ങളും റോഡ് തടയല്‍ സമരങ്ങളും നടത്തിയിരുന്നു. മലയോര റോഡുകളായ ചെര്‍ക്കള, കല്ലടുക്ക, ബദിയഡുക്ക, എത്തടുക്ക, കിന്നിംഗാര്‍ എന്നീ പാതകളുടെ കൂട്ടത്തില്‍ മുള്ളേരിയ നാട്ടക്കല്‍ കിന്നിംഗാര്‍ റോഡും നന്നാക്കണമെന്ന ആവശ്യമുയര്‍ന്നിരുന്നു.
റോഡുകളുടെ വികസനത്തിനുവേണ്ടി ഫണ്ട് നീക്കി വെക്കുമെന്ന സര്‍ക്കാര്‍ പ്രഖ്യാപനമുണ്ടായിട്ട് വര്‍ഷം പിന്നിട്ടുവെങ്കിലും ഇതുവരെയായി ഒരു നടപടിയുമില്ല. റോഡ് അറ്റകുറ്റ പ്രവര്‍ത്തനം നടത്തി സഞ്ചാര യോഗ്യമാക്കിയില്ലെങ്കില്‍ ശക്തമായ സമര പരിപാടികളുമായി മുന്നോട്ടു പോകുമെന്ന് നാട്ടുകാര്‍ മുന്നറിയിപ്പു നല്‍കി.