മാവൂര്‍: ഡിഫ്തീരിയ രോഗലക്ഷണം റിപ്പോര്‍ട്ട് ചെയ്യപ്പെട്ട സാഹചര്യത്തില്‍ മാവൂര്‍ ഗ്രാമപഞ്ചായത്തില്‍ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കാന്‍ തീരുമാനം.
ഗ്രാമപഞ്ചായത്ത് ഹാളില്‍ പ്രസിഡന്റ് സി. മുനീറത്തിന്റെ അധ്യക്ഷതയില്‍ ചേര്‍ന്ന യോഗത്തില്‍ രാഷ്ട്രീയ പാര്‍ട്ടി പ്രതിനിധികള്‍, യുവജന സംഘടനാ പ്രതിനിധികള്‍, വിവിധ സ്‌കൂളുകളുടെ പി.ടി.എ ഭാരവാഹികള്‍, കുടുംബശ്രീ പ്രവര്‍ത്തകര്‍, മറ്റു സന്നദ്ധ സംഘടനാ ഭാരവാഹികള്‍ പങ്കെടുത്തു.
പഞ്ചായത്തിലെ മുഴുവന്‍ സ്‌കൂളുകളിലും 19ന് അടിയന്തര പി.ടി.എ യോഗം വിളിച്ചുചേര്‍ത്തു രക്ഷിതാക്കളെ ബോധവല്‍ക്കരിക്കാനും ടി.ഡി വാക്‌സിന്‍ നല്‍കാനും തീരുമാനിച്ചു. വാര്‍ഡുതലത്തില്‍ കമ്മിറ്റി രൂപീകരിച്ചു പ്രതിരോധ നടപടികള്‍ ശക്തമാക്കും. എല്ലാ വീടുകളിലും ബോധവല്‍ക്കരണ നോട്ടിസ് എത്തിക്കും.
യോഗത്തില്‍ പ്രതിരോധ പ്രവര്‍ത്തനത്തെ കുറിച്ച് ഡോ. ഇ.എന്‍ വത്സരാജന്‍ ക്ലാസെടുത്തു. ഹെല്‍ത്ത് ഇന്‍സ്‌പെക്ടര്‍ ഉണ്ണികൃഷ്ണന്‍, ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ കവിതാഭായ്, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ. ഉസ്മാന്‍, ബ്ലോക്ക് പഞ്ചായത്ത് മെമ്പര്‍ കെ.എം അപ്പുക്കുഞ്ഞന്‍, എന്‍.പി അഹമ്മദ്, കെ.സി രവീന്ദ്രനാഥ്, കെ.പി ചന്ദ്രന്‍, ശശികുമാന്‍ സംബന്ധിച്ചു.