കോഴിക്കോട്: കാലവര്‍ഷം സജീവമായതിനെ തുടര്‍ന്ന് സംസ്ഥാനത്ത് കനത്തമഴ തുടരുന്നു. കര്‍ണാടക മുതല്‍ കേരള തീരംവരെ തുടരുന്ന ന്യൂനമര്‍ദപാത്തിയും വടക്കന്‍ കേരളത്തില്‍ സമുദ്രനിരപ്പില്‍ നിന്ന് 7.6 കി.മി ഉയരത്തിലായി രൂപപ്പെട്ട ചക്രവാതച്ചുഴിയുമാണ് മഴക്ക് കാരണമെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
ഇന്നലെ ഇടുക്കി, കോഴിക്കോട്, വയനാട്, കണ്ണൂര്‍, കോട്ടയം, എറണാകുളം ജില്ലകളില്‍ കനത്ത മഴ ലഭിച്ചു. വയനാട്ടിലെ വൈത്തിരിയില്‍ 17 സെ.മി മഴയാണ് ലഭിച്ചത്. സംസ്ഥാനത്ത് ഇന്നലെ ഏറ്റവും കൂടുതല്‍ മഴ ലഭിച്ചത് ഇവിടെയാണ്. പിറവം 15, നിലമ്പൂര്‍ 11, ഇരിക്കൂര്‍ 5.7 സെ.മി മഴ ലഭിച്ചു.
വെള്ളിയാഴ്ച വരെ സംസ്ഥാനത്ത് അതിതീവ്ര മഴക്ക് സാധ്യതയുണ്ടെന്ന് ദുരന്തനിവാരണ അതോറിറ്റി മുന്നറിയിപ്പ് നല്‍കുന്നുണ്ടെങ്കിലും കേന്ദ്രകാലാവസ്ഥാ വകുപ്പ് ഇതു സ്ഥിരീകരിക്കുന്നില്ല.
ഇന്നലെ വൈകിട്ട് ഇറക്കിയ ബുള്ളറ്റിന്‍ പ്രകാരം കേരളത്തില്‍ ഇന്നുകൂടി കനത്തമഴയും നാളെമുതല്‍ ഒറ്റപ്പെട്ട കനത്തമഴയുമാണ്. ഇന്ന് കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു.
അതിനിടെ, ഇന്നലെ കുറ്റ്യാടിക്കു സമീപം പശുക്കടവിനു സമീപം മീന്‍പറ്റ വനത്തില്‍ ഉരുള്‍പൊട്ടിയതായി റിപ്പോര്‍ട്ടുണ്ട്. ഇതേ തുടര്‍ന്ന് കുറ്റ്യാടിപ്പുഴ കരകവിഞ്ഞൊഴുകി. കക്കയം, പെരുവണ്ണാമൂഴി ഡാമുകള്‍ നിറഞ്ഞു.