വാണിയംകുളം: ദേശീയകായികതാരം സി. ബബിതയ്ക്ക് സര്‍ക്കാരിന്റെ കനിവ്. കായികമേളയില്‍ ട്രോഫികളും പുരസ്‌കാരങ്ങളും വാരിക്കൂട്ടിയ ബബിതയ്ക്ക് ഇതൊക്കെ സൂക്ഷിച്ചു വയ്ക്കാന്‍ അസൗകര്യമുള്ള ഒറ്റഷെഡ് വീടാണ് ഉള്ളത്.
ബബിതയുടെ ദയനീനാവസ്ഥ മാധ്യമങ്ങള്‍ റിപ്പോര്‍ട്ട് ചെയ്തതോടെ വാണിയംകുളം പഞ്ചായത്ത് ബബിതയ്ക്ക് വീട് നിര്‍മിക്കാന്‍ ഒരുക്കങ്ങള്‍ തുടങ്ങി.
പഞ്ചായത്ത് വിഭാവനം ചെയ്ത പദ്ധതിക്ക് സര്‍ക്കാര്‍ പച്ചക്കൊടി കാട്ടി.
വീട് നിര്‍മാണത്തിന് പഞ്ചായത്തിന് മൂന്നു ലക്ഷം രൂപയാണ് അനുവദിക്കാന്‍ കഴിയുക. പ്രത്യേക അനുമതിയുടെ കോപ്പി വാണിയംകുളം പഞ്ചായത്ത് പ്രസിഡന്റ് എം പ്രിയ ബബിതയുടെ വീട്ടില്‍ എത്തി നല്‍കി.
പഞ്ചായത്ത് ഭരണസമിതി സ്ഥലം എം.എല്‍.എ പി.കെ ശശി മുഖേന ഇതു സംബന്ധിച്ച് നിവേദനം നല്‍കിയിരുന്നു.
വാണിയംകുളം ചെറുകാട്ടുപലം ചുക്കാര്‍മാര്‍ തൊടിയില്‍ ബാലകൃഷ്ണന്റെയും കമലത്തിന്റെയും മകളാണ് ഈ ദേശീയതാരം. കല്ലടി ഹയര്‍സെക്കന്‍ഡറി സ്‌കൂളില്‍ പ്ലസ്ടു കഴിഞ്ഞ് ഫലം കാത്തിരിക്കുകയാണ് സി ബബിത.