മുത്തങ്ങ: മുത്തങ്ങ റെയ്ഞ്ചിലെ തോട്ടാമൂല കൂളുകുന്നില്‍ കാട്ടാനയെ ചരിഞ്ഞ നിലയില്‍ കണ്ടെത്തി. സ്വകാര്യവ്യക്തിയുടെ തോട്ടത്തില്‍ വൈദ്യുതി കമ്പിവേലിയില്‍ത്തട്ടി നിലത്ത് മുട്ടുകുത്തി കിടക്കുന്ന നിലയിലാണ് ജഡം കണ്ടെത്തിയത്.
വയനാട് വന്യജീവിസങ്കേതത്തിലെ മുത്തങ്ങ റെയ്ഞ്ച് തോട്ടാമൂല ഫോറസ്റ്റ് സ്‌റ്റേഷനില്‍ പരിധിയില്‍വരുന്ന കൂളുകുന്ന് വനമേഖലയോട് ചേര്‍ന്ന ഭാഗത്ത് സ്വകാര്യവ്യക്തിയുടെ തോട്ടത്തിലാണ് ഏഴുവയസുള്ള പിടിയാനയെ ചരിഞ്ഞ നിലയില്‍ കണ്ടെത്തിയത്. ഇന്നലെ രാവിലെ പ്രദേശവാസികളാണ് ആനയെ ചരിഞ്ഞ നിലയില്‍ കണ്ടെത്തിയത്. സംഭവത്തെ തുടര്‍ന്ന് മുത്തങ്ങ അസിസ്റ്റന്റ് വൈല്‍ഡ്‌ലൈഫ് വാര്‍ഡന്‍ അജയ്‌ഘോഷിന്റെ നേതൃത്വത്തില്‍ വനപാലകര്‍ സ്ഥലത്തെത്തി നടപടികള്‍ സ്വീകരിച്ചു.