ലക്‌നൗ: ഉത്തര്‍പ്രദേശിലെ കാണ്‍പൂരില്‍ എട്ടു പൊലിസുകാരെ വെടിവച്ചു കൊന്ന കേസില്‍ പിടിയിലായി ഒരു ദിവസത്തിനകം കൊല്ലപ്പെട്ട ഗുണ്ടാനേതാവ് വികാസ് ദുബെയുടെ ഒരു സഹായികൂടി പിടിയില്‍. ഇയാളുടെ സഹായികളായ ചിലര്‍ക്കുവേണ്ടി പൊലിസ് വ്യാപക തിരച്ചില്‍ നടത്തുന്നതിനിടെയാണ് ഇതില്‍ ഒരാള്‍ താനെയില്‍വച്ച് മഹാരാഷ്ട്ര എ.ടി.എസിന്റെ പിടിയിലായത്.

അരവിന്ദ് രാംവിലാസ് ത്രിവേദി (46) ആണ് പിടിയിലായത്. ഇയാള്‍ ദുബെയുടെ അടുത്ത സഹായിയാണ്. ഇയാളുടെ കൂടെയുണ്ടായിരുന്ന ഡ്രൈവര്‍ സുഷീല്‍കുമാര്‍ സുരേഷും അറസ്റ്റിലായിട്ടുണ്ട്. കേസില്‍ ദുബെയുടെ ചില കൂട്ടാളികള്‍ നേരത്തെ പിടിയിലാകുകയും അഞ്ചു പേരെ പൊലിസ് ഏറ്റുമുട്ടലുകളില്‍ കൊലപ്പെടുത്തുകയും ചെയ്തിരുന്നു. എന്നാല്‍, പൊലിസ് കസ്റ്റഡിയിലിരിക്കെ ദുബെ വെടിയേറ്റ് മരിച്ചതും സഹായികളെ വിവിധ സ്ഥലങ്ങളില്‍വച്ച് പൊലിസ് കൊന്നതും വ്യാജ ഏറ്റുമുട്ടലുകളായിരുന്നെന്ന ആരോപണം ശക്തമാകുകയാണ്. ദുബെയ്ക്കു നെഞ്ചിലും കൈയിലുമായി നാലു വെടിയേറ്റിട്ടുണ്ടായിരുന്നു.

അതേസമയം, വികാസ് ദുബെയെ കൊന്ന പൊലിസ് നടപടിയെ ന്യായീകരിച്ച് അായളുടെ പിതാവ് രംഗത്തെത്തി. യു.പി പൊലിസിന്റേത് ശരിയായ തീരുമാനമാണെന്നും കുടുംബത്തെ ദുബെ സഹായിച്ചിരുന്നില്ലെന്നും തങ്ങള്‍ പറഞ്ഞതു കേട്ടിരുന്നെങ്കില്‍ അവന്റെ ജീവിതം ഇത്തരത്തില്‍ അവസാനിക്കില്ലായിരുന്നെന്നും പിതാവ് രാംകുമാര്‍ ദുബെ വ്യക്തമാക്കി. ദുബെയുടെ ശവസംസ്‌കാര ചടങ്ങില്‍ കുടുംബത്തില്‍നിന്ന് ഭാര്യയും ഭാര്യാ സഹോദരനും ഒരു മകനും മാത്രമാണ് പങ്കെടുത്തിരുന്നത്.