ന്യൂഡല്‍ഹി: ഗുജറാത്തിലെ അന്താരാഷട്ര അതിര്‍ത്തിയില്‍ പാകിസ്താന്‍ വ്യോമതാവളം തുറന്നതായി റിപ്പോര്‍ട്ട്. ഗുജറാത്തിലെ സൗരാഷ്ട്ര -കച്ച് മേഖലക്ക് സമീപമാണ് താവളം തുറന്നത്. ഇന്ത്യയെ നിരീക്ഷിക്കുന്നതിനായി പാകിസ്താന് ചൈനയുടെ വക ചാര ഉപഗ്രഹം ലഭിച്ച വാര്‍ത്ത കഴിഞ്ഞ ദിവസം പുറത്തുവന്നിരുന്നു.
വ്യോമതാവളത്തിന്റെ നിര്‍മാണം നേരത്തെ തന്നെ പൂര്‍ത്തിയാക്കിയിരുന്നെങ്കിലും ഇവിടെക്ക് പോര്‍ വിമാനങ്ങള്‍ ഉള്‍പ്പെടെയുള്ളവ വിന്യസിക്കുന്നത് ഇപ്പോഴാണ് തുടങ്ങിയതെന്നാണ് റിപ്പോര്‍ട്ട്.
ചൈനയില്‍ വികസിപ്പിച്ചെടുത്ത ജെ.എഫ് -17 യുദ്ധ വിമാനങ്ങള്‍ ഇവിടെ വിന്യസിക്കുമെന്നാണ് സൂചന. കശ്മിരിലെ വിഘടനവാദികള്‍ക്കുള്‍പ്പെടെ ഇന്ത്യാ വിരുദ്ധ ശക്തികള്‍ക്കെല്ലാം സഹായവും സഹകരണവും നല്‍കുന്ന നിലപാടാണ് പാക് സൈന്യം ഇതുവരേ ചെയ്തുവന്നിട്ടുള്ളത്.
രാത്രിയും പകലും ഒരു പോലെ നിരീക്ഷണം നടത്താന്‍ ശേഷിയുള്ള പ്രസ്1 എന്ന ഉപഗ്രഹമാണ് ചൈന പാകിസ്താന് നല്‍കിയത്. ഇതിന് പുറമെ തദ്ദേശിയമായി വികസിപ്പിച്ച പാക് ടി.ഇ.എസ്1.എ എന്ന ഉപഗ്രഹവും പാകിസ്താന്‍ വിക്ഷേപിച്ചിട്ടുണ്ട്.കശ്മിരില്‍ സംഘര്‍ഷം തുടരുകയും, പാകിസ്താന്‍ അതിര്‍ത്തിയില്‍ നിരന്തരമായി പ്രക്ഷുബ്ദാവസ്ഥ സൃഷ്ടിക്കുകയും ചെയ്യുന്ന സാഹചര്യത്തിലെ നീക്കങ്ങള്‍ ഇന്ത്യന്‍ സൈന്യം ജാഗ്രതയോടെ വീക്ഷിക്കുന്നുണ്ട്.