മുംബൈ: ശമനമില്ലാതെ തുടരുന്ന മഴയില്‍ മുങ്ങി മുംബൈ നഗരം. ജനജീവിതം ഏറെ ദുസഹമായി തുടരുന്നു. കഴിഞ്ഞ മൂന്നു ദിവസമായി തുടരുന്ന മഴയാണ് പ്രയാസം സൃഷ്ട്രിക്കുന്നത്. റോഡ്, റെയില്‍ ഗതാഗതത്തെയും മഴ ബാധിച്ചു. പാളങ്ങളില്‍ വെള്ളം കയറിയതിനാല്‍ സബര്‍ബന്‍ ട്രെയിന്‍ സര്‍വിസുകള്‍ എല്ലാം നിറുത്തിവച്ചു. വസായി വിരാര്‍ റൂട്ടിലെ അതിവേഗ പാതയിലെ ട്രെയിന്‍ ഗതാഗതം നിര്‍ത്തി. പാളത്തിലെ വെള്ളം വറ്റിയതിന് ശേഷം മാത്രമേ ട്രെയിനുകള്‍ സര്‍വിസ് നടത്തുകയുള്ളൂ. കനത്ത മഴയെ തുടര്‍ന്ന് താഴ്ന്ന പ്രദേശങ്ങളെല്ലാം വെള്ളത്തിനടിയിലാണ്.
മുംബൈ വിമാനത്താവളത്തില്‍നിന്നു പുറപ്പെടേണ്ട 72 വിമാനങ്ങള്‍ വൈകി. മുംബൈ നഗരത്തിലെ ഭക്ഷണ വിതരണക്കാരായ ഡബ്ബാവാലകളെല്ലാം ഇതോടെ സര്‍വിസ് നിറുത്തിവച്ചിരിക്കയാണ്.