അടിമാലി: സമാന്തര സര്‍വീസ് വാഹനവുമായി ഉണ്ടായ തര്‍ക്കം സംഘര്‍ഷത്തില്‍ കലാശിച്ചു. ബസ് ജീവനക്കാരും ഓട്ടോതൊഴിലാളികളും തമ്മിലുണ്ടായ സംഘട്ടനത്തില്‍ ഒരാള്‍ക്ക് പരുക്കേറ്റു. പ്രതിഷേധ സൂചകമായി സ്വകാര്യ ബസുകള്‍ പണിമുടക്കി.
ഇന്നലെ അടിമാലി മച്ചിപ്ലാവിലാണ് പ്രശ്‌നങ്ങളുടെ തുടക്കം. അടിമാലി -ഇരുമ്പുപാലം റൂട്ടില്‍ സര്‍വ്വീസ് നടത്തുന്ന സ്വകാര്യ ബസിന് മുന്നില്‍ സമാന്തരമായി ഓട്ടോറിക്ഷ യാത്രക്കാരെ കയറ്റി സര്‍വ്വിസ് നടത്തി. മച്ചിപ്ലാവില്‍വച്ച് ഇതിനെ ബസ് ജീവനക്കാര്‍ ചോദ്യം ചെയ്തു. ഇത് സംഘര്‍ഷത്തില്‍ കലാശിക്കുകയും പരുക്കേറ്റ ബസ് ജീവനക്കാരന്‍ വില്‍സണ്‍ അടിമാലി താലൂക്കാശുപത്രിയില്‍ ചിക്തസ തേടുകയും ചെയ്തു.
ഇതിനെചൊല്ലി അടിമാലി ടൗണില്‍ ഹില്‍ഫോര്‍ട്ട് ജങ്ഷനില്‍ സമാന്തര സര്‍വീസ് നടത്തിപ്പുകാരുടെ വാഹനം ബസ് ജീവനക്കാര്‍ തടയാനെത്തിയതോടെ വീണ്ടും തര്‍ക്കവും സംഘര്‍വും ഉണ്ടാവുകയായിരുന്നു. തുടര്‍ന്ന് ഇരുമ്പുപാലം റൂട്ടില്‍ സര്‍വീസ് നിര്‍ത്തിവച്ച് ബസ് ജീവനക്കാര്‍ പണിമുടക്കി. പ്രശ്‌നപരിഹാരത്തിനായി പൊലിസ് ചര്‍ച്ച നടത്തി.