തളിപ്പറമ്പ്: സര്‍സയ്യിദ് കോളജ് കാംപസിനകത്തെ എം.എസ്.എഫ് കൊടിതോരണങ്ങളും ഫഌക്‌സുകളും പുറത്ത് നിന്നെത്തിയ എസ്.എഫ്.ഐ സംഘം നശിപ്പിച്ചതായി പരാതി. എസ്.എഫ്.ഐ തളിപ്പറമ്പ് ഏരിയാ സെക്രട്ടറി ശ്രീകുമാര്‍ അമ്മാനപ്പാറയുടെ നേതൃത്വത്തിലുള്ള സംഘമാണ് അക്രമം നടത്തിയതെന്നും ഇതിന്റെ ദൃശ്യങ്ങള്‍ കോളജ് കാംപസില്‍ സ്ഥാപിച്ച സി.സി.ടി.വിയില്‍ പതിഞ്ഞിട്ടുണ്ടെന്നും പരാതിയില്‍ പറയുന്നു. തിങ്കളാഴ്ച രാവിലെ 7.30ഓടെയാണ് സംഭവം. കോളജില്‍ നവാഗതരെ സ്വാഗതം ചെയ്യുന്നതിനായാണ് എം.എസ്.എഫ് കൊടിതോരണങ്ങളും ഫഌക്‌സ് ബോര്‍ഡുകളും സ്ഥാപിച്ചിരുന്നത്. കോളജിന്റെ പിറക് വശത്തെ കവാടത്തിലൂടെ ചാടിക്കടന്നാണ് സംഘം കാംപസിനകത്ത് കയറിയത്. തുടര്‍ന്ന് കത്തിവാള്‍ ഉപയോഗിച്ച് കൊടിതോരണങ്ങളും ബോര്‍ഡുകളും നശിപ്പിക്കുകയായിരുന്നു. എസ്.എഫ്.ഐ ഏരിയാ സെക്രട്ടറിക്ക് പുറമെ നേതാക്കളായ വിശാല്‍ പൂപ്പാറ, ദീപക് മംഗര എന്നിവരാണ് അക്രമം നടത്തിയതെന്നും സമാധാനാന്തരീക്ഷം നിലനില്‍ക്കുന്ന കാംപസില്‍ അക്രമം നടത്തി കലാപമുണ്ടാക്കാനാണ് എസ്.എഫ്.ഐ ശ്രമിക്കുന്നതെന്നും എം.എസ്.എഫ് യൂനിറ്റ് പ്രസിഡന്റ് ഹസീല്‍ നരിക്കുനി, ജനറല്‍ സെക്രട്ടറി ഷാനിം അഴീക്കോട് എന്നിവര്‍ വ്യക്തമാക്കി.