വടകര: താഴെഅങ്ങാടി ഒന്തം മേല്‍പ്പാലത്തില്‍ അനധികൃത പാര്‍ക്കിങ് സജീവമാകുമ്പോഴും പൊലിസടക്കമുള്ള അധികൃതര്‍ നിസംഗത കാണിക്കുന്നു. പാലങ്ങളില്‍ പാര്‍ക്കിങ്ങ് പാടില്ലെന്നിരിക്കെയാണ് ഒന്തം മേല്‍പ്പാലത്തിന് ഇരുവശവും വാഹനങ്ങള്‍ അനധികൃതമായി പാര്‍ക്ക് ചെയ്യുന്നത്.
ഇതുകാരണം കാല്‍നടയാത്രക്കാരും മറ്റ് വാഹനങ്ങള്‍ക്കും ഏറെ ബുദ്ധിമുട്ടിയാണ് കടന്നുപോകുന്നത്. അതേസമയം ഡിപ്പോയിലേക്കും തിരിച്ചുമുള്ള കെ.എസ്.ആര്‍.ടി.സി ബസുകള്‍ ഇതുവഴി കടന്നുപോകുമ്പോള്‍ ഇവിടെ ഗാതഗതക്കുരുക്ക് പതിവാണ്.
നഗരസഭ കാര്യാലയം, സ്‌കൂളുകള്‍, തണല്‍ ഡയാലിസിസ് കേന്ദ്രം എന്നിവിടങ്ങളിലേക്കുള്ള വാഹനങ്ങളും ഏറെ പ്രയാസപ്പെട്ടാണ് ഇതുവഴി കടന്നുപോകുന്നത്. അതേസമയം അനധികൃത പാര്‍ക്കിങ് കാരണം ഗതാഗതക്കുരുക്ക് ഉണ്ടാകുമ്പോഴും അധികൃതര്‍ നടപടിയെടുക്കാത്തതിനെതിരേ ആക്ഷേപമുയരുന്നുണ്ട്. ലിങ്ക് റോഡ് പൂര്‍ണമായും പാര്‍ക്കിങ്ങിനു മാത്രമായി മാറിയതുപോലെ ഒന്തം റോഡും മാറുമോയെന്നാണ് നാട്ടുകാരും വ്യാപാരികളും ചോദിക്കുന്നത്.
അടിയന്തരമായി ഇവിടെ നോപാര്‍ക്കിങ്ങ് ബോര്‍ഡുകള്‍ സ്ഥാപിച്ച് അനധികൃത പാര്‍ക്കിങ്ങിന് അറുതിവരുത്തണമെന്നാണ് നാട്ടുകാരുടെ ആവശ്യം.