കൊല്‍ക്കത്ത: ഐ ലീഗ് ക്ലബായിരുന്ന ഈസ്റ്റ് ബംഗാളും പുതിയ സീസണില്‍ ഐ.എസ്.എല്ലിലെത്തും. നേരത്തെ ക്ലബ് ഐ.എസ്.എല്ലിലെത്തുമെന്ന് അറിയിപ്പുണ്ടായിരുന്നെങ്കിലും പിന്നീട് സാങ്കേതിക തടസം കാരണം പുതിയ സീസണില്‍ ഇത് ഉണ്ടാകില്ലെന്ന് അറിയിച്ചിരുന്നു.
എന്നാല്‍ കഴിഞ്ഞ ദിവസമാണ് വീണ്ടും ഈസ്റ്റ് ബംഗാളിന്റെ ഐ.എസ്.എല്‍ പ്രവേശനം ചര്‍ച്ചയായത്. ഈസ്റ്റ് ബംഗാളിന്റെ എതിരാളികളായ മോഹന്‍ ബഗാന്‍ എ.ടി.കെയില്‍ ചേര്‍ന്ന് ഐ.എസ്.എല്ലില്‍ പ്രവേശിച്ചിരിക്കുകയാണിപ്പോള്‍.

ഈ സാഹചര്യത്തിലാണ് കൊല്‍ക്കത്തയിലെ വമ്പന്‍മാരായ ഈസ്റ്റ് ബംഗാളും ഐ.എസ്.എല്ലില്‍ പ്രവേശനത്തിനൊരുങ്ങുന്നത്. ഉടന്‍ തന്നെ ഐ.എസ്.എല്‍ പ്രവേശനത്തിനുള്ള നടപടികള്‍ പൂര്‍ത്തിയാക്കുമെന്ന് ഈസ്റ്റ് ബംഗാള്‍ കമ്മിറ്റി അംഗം ദബബത്ര സര്‍ക്കാര്‍ പറഞ്ഞു. ഈ സീസണില്‍ കേരളത്തില്‍ നിന്നുള്ള മലയാളി താരങ്ങള്‍ ഈസ്റ്റ് ബംഗാളുമായി കരാറിലെത്തിയിട്ടുണ്ട്. അവരെയും ഐ.എസ്.എല്ലില്‍ ഈസ്റ്റ് ബംഗാളിനൊപ്പും പുതിയ സീസണില്‍ കാണാനാകും.

മലയാളി ഗോള്‍ കീപ്പര്‍ മിര്‍ഷാദ് ഇതിനോടകം തന്നെ ഈസ്റ്റ് ബംഗാളുമായി കരാര്‍ പുതുക്കിക്കഴിഞ്ഞു. അവസാന രണ്ട് സീസണുകളായി ഈസ്റ്റ് ബംഗാളിന്റെ താരമാണ് മിര്‍ഷാദ്.