കല്‍പ്പറ്റ: സ്‌കൂളിന് അവധിയുണ്ടോ എന്നറിയാന്‍ കലക്ടറേറ്റ് കണ്‍ട്രോള്‍ റൂമിലേക്കു വിളിച്ച വാളാട് സ്വദേശിക്ക് ഡ്യൂട്ടിയിലുണ്ടായിരുന്ന ഹോംഗാര്‍ഡിന്റെ പരിഹാസം.
വാളാട് സ്വദേശി കട്ടിയാടന്‍ മുഹമ്മദലിയാണ് കലക്ടറേറ്റിലെ കണ്‍ട്രോള്‍ റൂമിലേക്ക് വിളിച്ചത്. ഇന്ന് സ്‌കൂള്‍ ഉണ്ടോ എന്നന്വേഷിച്ചപ്പോള്‍ സ്‌കൂള്‍ അവിടെത്തന്നെയുണ്ടല്ലോ, സ്‌കൂള്‍ എവിടെപ്പോകാനാ എന്ന മറുപടിയാണ് ഉദ്യോഗസ്ഥനില്‍ നിന്നും ഉണ്ടായത്. ഫോണില്‍ വിവരമറിയാന്‍ വിളിച്ചയാളെ പരിഹസിച്ചതിനു ശേഷം നിങ്ങള്‍ വിദ്യാഭ്യാസമുള്ള ആളല്ലേ സ്‌കൂള്‍ ഉണ്ടോ എന്നാണോ സ്‌കൂളിന് അവധിയുണ്ടോ എന്നല്ലേ ചോദിക്കേണ്ടത് എന്ന ഉപദേശവും ഉദ്യോഗസ്ഥന്റെ വകയുണ്ടായി.
കഴിഞ്ഞ ദിവസം രാവിലെയാണ് വാളാട് സ്വദേശി കണ്‍ട്രോള്‍ റൂമിലേക്ക് വിളിച്ചത്. പൊതുജനത്തെ അവഹേളിച്ച ഉദ്യോഗസ്ഥനെതിരേ നടപടിയെടുക്കണമെന്ന ആവശ്യം ശക്തമായതോടെ വിഷയത്തില്‍ അഡീഷണല്‍ ജില്ലാ മജിസ്‌ട്രേറ്റ് അന്വേഷണം നടത്തി.
ഇത്തരത്തില്‍ മറുപടി നല്‍കിയ കണ്‍ട്രോള്‍ റൂമില്‍ രാത്രി കാല ഡ്യൂട്ടിക്കുണ്ടായിരുന്ന ഹോംഗാര്‍ഡിന് താക്കീത് നല്‍കിയതായി ജില്ലാ കലക്ടര്‍ അറിയിച്ചു.