കണ്ണൂര്‍: പാലത്തായിയില്‍ ബി.ജെ.പി നേതാവ് നാലാം ക്ലാസ് വിദ്യാര്‍ഥിനിയെ പീഡിപ്പിച്ച കേസില്‍ ക്രൈംബ്രാഞ്ചിന്റെ അനാസ്ഥക്കെതിരേ വനിതാ നേതാക്കളെയും ആക്റ്റിവിസ്റ്റുകളെയും പങ്കെടുപ്പിച്ച് വിമന്‍ ജസ്റ്റിസ് മൂവ്‌മെന്റെിന്റെ ആഭിമുഖ്യത്തില്‍ നടത്തിയ വെര്‍ച്വല്‍ പെണ്‍ പ്രതിഷേധം ശ്രദ്ധേയമായി.
പാലത്തായി പോക്‌സോ കേസിലെ മുഖ്യപ്രതി അറസ്റ്റു ചെയ്യപ്പെട്ട് മൂന്നു മാസം പൂര്‍ത്തിയാകാറായിട്ടും കുറ്റപത്രം സമര്‍പ്പിക്കപ്പെടാത്തത് പ്രതിയെ രക്ഷിച്ചെടുക്കാനുള്ള ശ്രമത്തിന്റെ ഭാഗമാണ്. മറ്റൊരാള്‍ കൂടി പീഡിപ്പിച്ചിട്ടുണ്ടെന്ന കുട്ടിയുടെ മാതാവിന്റെ പരാതിയില്‍ ഇതുവരെ കുട്ടിയുടെ മൊഴി എടുക്കുകയോ എഫ്.ഐ.ആര്‍ ഇടുകയോ അന്വേഷണം പുരോഗമിക്കുകയോ ചെയ്തിട്ടില്ല. 90 ദിവസമായാല്‍ കുറ്റപത്രം സമര്‍പ്പിക്കാതിരിക്കെ പത്മരാജന് സ്വാഭാവിക ജാമ്യം കിട്ടാന്‍ സാധ്യതയുണ്ട്. കുറ്റകരമായ ഈ അനാസ്ഥക്കെതിരേ പെണ്‍ പ്രതിഷേധത്തില്‍ പങ്കെടുത്തവര്‍ മുന്നറിയിപ്പ് നല്‍കി. രമ്യ ഹരിദാസ് എം.പി, വിമന്‍ ജസ്റ്റിസ് മൂവ്‌മെന്റെ സംസ്ഥാന പ്രസിഡന്റ് ജബീന ഇര്‍ഷാദ്, എം.എസ്.എഫ് ദേശീയ സെക്രട്ടറി ഫാത്തിമ തഹ്ലിയ, അഡ്വ.കെ.പി മറിയുമ്മ, ലതിക സുഭാഷ്, സോയ ജോസഫ്, ഇ.സി ആയിശ, ഗോമതി, അജിത, എം.സുല്‍ഫത്ത്, ബിന്ദു അമ്മിണി, റാനിയ സുലൈഖ, ചന്ദ്രിക കൊയിലാണ്ടി, മിനി വേണുഗോപാല്‍, സി. ഉഷാകുമാരി സംസാരിച്ചു.