തിരുവനന്തപുരം: സംസ്ഥാനത്ത് ഇന്ന് 449 പേര്‍ക്ക് കൊവിഡ് രോഗം സ്ഥിരീകരിച്ചു. രണ്ടു മരണവും റിപ്പോര്‍ട്ട് ചെയ്തു. നാനൂറിനു മുകളില്‍ കടന്ന രോഗികള്‍ നാലാം ദിവസവും മുമ്പോട്ടുതന്നെയാണ്. പരിഭ്രാന്ത്രി അകലുന്നില്ലെന്നു വ്യക്തം. ആശങ്ക ഉയരുകതന്നെയാണെന്നും കണക്കുകള്‍ വ്യക്തമാക്കുന്നു. ആലപ്പുഴയിലാണ് ഇന്ന് ഏറ്റവും വലിയ പരിഭ്രാന്തി
പരത്തി രോഗം പടര്‍ന്നിരിക്കുന്നത്. ഇവിടെ 119 പേര്‍ക്കാണ് ഇന്നു മാത്രം രോഗം വ്യാപിച്ചത്. 
കൊല്ലത്തും കണ്ണൂരുമാണ് ഓരോരുത്തര്‍ മരിച്ചത്. കൊല്ലം ജില്ലയിലെ 74 വയസ്സുള്ള ത്യാഗരാജന്‍, കണ്ണൂര്‍ ജില്ലയിലെ 64 വയസ്സുള്ള അയിഷ എന്നിവരാണ് മരിച്ചത്.

ഇതോടെ കൊവിഡ് ബാധിച്ച് മരിച്ചവരുടെ അംഗസംഖ്യ 33 ആയി. ഇവരുടെ മരണം കഴിഞ്ഞ ദിവസമായിരുന്നു. ഫലം പുറത്തുവന്നത് കഴിഞ്ഞ ദിവസമാണ്. അതേസമയം ഇന്നു രോഗം സ്ഥിരീകരിച്ചവരില്‍ 140 പേരാണ് വിദേശങ്ങളില്‍ നിന്നെത്തിയവര്‍. മറ്റു സംസ്ഥാനത്തുനിന്നെത്തിയവര്‍ 64 പേരാണ്. സമ്പര്‍ക്കംവഴി ഇന്ന് 144 പേര്‍ക്കാണ് രോഗം പിടിപെട്ടത്. ഉറവിടം കണ്ടെത്താത്തവര്‍ 18 പേരുണ്ട്.

അഞ്ചു ആരോഗ്യ പ്രവര്‍ത്തകര്‍ക്കും രോഗം പിടിപെട്ടിട്ടുണ്ട്. ഇന്ന് 719 പേരെയാണ് കൊവിഡ് ലക്ഷണവുമായി ആശുപത്രിയില്‍ പ്രവേശിപ്പിച്ചിട്ടുള്ളത്. സംസ്ഥാനത്ത് ഇത്രയധികം പേരെ ആശുപത്രിയില്‍ പ്രവേശിപ്പിച്ചത് ഇന്നാണ്. ഇപ്പോള്‍ സംസ്ഥാനത്ത് 223 ഹോട്ട് സ്‌പോട്ടുകളാണുള്ളത്.

കൊവിഡ് സ്ഥിരീകരിച്ചവരുടെ ജില്ല തിരിച്ചുള്ള കണക്ക് ഇങ്ങനെയാണ്. ആലപ്പുഴ 119, തിരുവനന്തപുരം 63, മലപ്പുറം 47, പത്തനം തിട്ട 47, കണ്ണൂര്‍ 44, കൊല്ലം 33, പാലക്കാട് 19, കോഴിക്കോട് 16, എറണാകുളം 15, വയനാട് 14, കോട്ടയം 10, തൃശ്ശൂര്‍ കാസര്‍കോട് 9, ഇടുക്കി 4.

കഴിഞ്ഞ 24 മണിക്കൂറില്‍ 12230 സാമ്പിളുകള്‍ പരിശോധിച്ചു. 1, 80, 594 പേരാണ് നിരീക്ഷണത്തിലുള്ളത്. 4376 പേര്‍ ആശുപത്രികളിലുണ്ട്. ഇന്ന് 713 പേരെയാണ് ആശുപത്രിയിലാക്കിയത്. ഏറ്റവും കൂടുതല്‍ പേരെ ആശുപത്രിയിലാക്കിയത് ഇന്നാണ്.ഇതുവരെ 2,44,388 സാമ്പിളുകള്‍ അയച്ചു. ഇതില്‍ 5407 സാമ്പിളുകളുടെ ഫലം വരാനുണ്ട്. കൂടാതെ, സെന്റിനല്‍ സര്‍വൈലന്‍സ് വഴി 78,002 സാമ്പിളുകള്‍ ശേഖരിച്ചു. ഇതില്‍ 74,676 സാമ്പിളുകള്‍ നെഗറ്റീവായി. ഹോട്ട്‌സ്‌പോട്ടുകളുടെ എണ്ണം 223 ആയി.

തിരുവനന്തപുരം നഗരത്തിലെ മാണിക്യവിളാകം, പൂന്തുറ, പുത്തന്‍പള്ളി വാര്‍ഡുകളും ചവറ, പന്മന, പട്ടണക്കാട്, ചേര്‍ത്തല സൗത്ത്, മാരാരിക്കുളം നോര്‍ത്ത്, ഓടംതുരുത്ത്, കുത്തിയതോട്, തുറവൂര്‍, ആറാട്ട് പുഴ, ചെല്ലാനം, പെരുമ്പടപ്പ്, വെളിയങ്കോട് പഞ്ചായത്തുകളും പൊന്നാനി, താനൂര്‍ മുന്‍സിപ്പാലിറ്റികളിലും ട്രിപ്പിള്‍ ലോക്ക്ഡൗണ്‍ വരും. തീരപ്രദേശങ്ങളിലെ രോഗവ്യാപനം തടയാന്‍ പ്രത്യേക ആക്ഷന്‍ പ്ലാനുണ്ടാകും. രണ്ട് ലാര്‍ജ് കമ്മ്യൂണിറ്റി ക്ലസ്റ്ററുകളടക്കം 51 ക്ലസ്റ്ററുകള്‍ സംസ്ഥാനത്തുണ്ട്. ഇവിടങ്ങളില്‍ സമ്പര്‍ക്കവും രോഗബാധയും കണ്ടെത്താനുള്ള ശ്രമം നടക്കുന്നു.