തിരുവനന്തപുരം: വിവരാവകാശ അപേക്ഷക്ക് നിശ്ചിത സമയപരിധിക്കുള്ളില്‍ മറുപടി നല്‍കാതിരുന്ന പൊതു വിവരാവകാശ ഓഫിസര്‍ക്ക് 11,500 രൂപ പിഴ.
കേരളാ സ്റ്റേറ്റ് കൗണ്‍സില്‍ ഫോര്‍ സയന്‍സ്, ടെക്‌നോളജി ആന്‍ഡ് എന്‍വയണ്‍മെന്റിലെ പൊതു വിവരാവകാശ ഓഫിസറായിരുന്ന എം.ബി ഗീതാലക്ഷ്മിയെയാണ് വിവരാവകാശ കമ്മിഷണര്‍ ഡോ.കെ.എല്‍ വിവേകാനന്ദന്‍ ശിക്ഷിച്ചത്.
കാസര്‍കോട് കേന്ദ്ര സര്‍വകലാശാലയിലെ അസോസിയേറ്റ് പ്രൊഫസര്‍ ഡോ.പദ്‌മേഷ് പി. പിള്ള സമര്‍പ്പിച്ച വിവരാവകാശ അപേക്ഷക്ക് മറുപടി നല്‍കുന്നതില്‍ വീഴ്ച വരുത്തിയതിനാണ് നടപടി.
വിവരാവകാശ നിയമത്തിലെ 7(1) വകുപ്പനുസരിച്ച് 30 ദിവസത്തിനുള്ളില്‍ നല്‍കേണ്ട മറുപടി 46 ദിവസം വൈകിയതിന് ഓരോ ദിവസത്തിനും 250 രൂപ എന്ന ക്രമത്തിലാണ് ശിക്ഷ നിശ്ചയിച്ചത്.