സിയൂള്‍: കൊറിയന്‍ ഉപഭൂഖണ്ഡത്തില്‍ യുദ്ധത്തിന് തുടക്കമിട്ടാല്‍ അമേരിക്കയെ തുടച്ചുനീക്കുമെന്ന് ഉത്തര കൊറിയയുടെ ഔദ്യോഗിക വെബ്‌സൈറ്റ്.
ഉത്തര കൊറിയ ആറാമത്തെ ആണവ പരീക്ഷണം നടത്തിയേക്കുമെന്ന സൂചനകള്‍ പുറത്തുവന്നതിനെ തുടര്‍ന്ന് യു.എസ് സൂപ്പര്‍ കാരിയര്‍ യു.എസ്.എസ് കാള്‍ വിന്‍സണ്‍ കൊറിയന്‍ തീരത്തേക്ക് പുറപ്പെട്ടിട്ടുണ്ട്. ഈ കപ്പല്‍ തങ്ങള്‍ ആക്രമിച്ച് മുക്കുമെന്നും കഴിഞ്ഞ ദിവസം ഉത്തര കൊറിയ വ്യക്തമാക്കിയിരുന്നു.
ഉത്തര കൊറിയയില്‍നിന്ന് അമേരിക്ക വരെയെത്തുന്ന ആണവ മിസൈലുകളുണ്ടെന്ന് അവകാശപ്പെടുന്നുണ്ടെങ്കിലും അതിനുള്ള ശേഷി ഇനിയും കൈവരിച്ചിട്ടില്ലെന്നാണ് യു.എസ് നിഗമനം. ഉത്തര കൊറിയക്കെതിരേ സൈനിക നടപടിയുണ്ടായേക്കുമെന്ന സാഹചര്യത്തില്‍ ഉത്തര കൊറിയന്‍ ഭരണകക്ഷിയുടെ മുഖപത്രത്തില്‍ തങ്ങളുടെ സൈനിക ശക്തിയെ വിശദീകരിക്കുന്ന ലേഖനങ്ങളും മുഖപ്രസംഗവുമാണ് വരുന്നത്.
ഉത്തര കൊറിയയുടെ ഔദ്യോഗിക വെബ്‌സൈറ്റായ ഉറിമിന്‍സോക്കിരിയില്‍ വന്ന മുഖപ്രസംഗത്തില്‍ അമേരിക്കക്ക് ഉത്തര കൊറിയയെ കണക്കുകൂട്ടുന്നതില്‍ തെറ്റുപറ്റിയെന്നാണ് പറയുന്നത്. ഉത്തര കൊറിയയുടെ സൈനിക ഓഫിസറാണ് മുഖപ്രസംഗം എഴുതിയത്