പൊന്നാനി: നാടോടി ബാലികയെ ആക്രമിച്ചതിന് അറസ്റ്റിലായ സി.പി.എം നേതാവ് സി. രാഘവനെ പൊന്നാനി കോടതി 15 ദിവസത്തേക്ക് റിമാന്‍ഡ് ചെയ്തു. അതേസമയം ഇയാള്‍ക്കെതിരേ നടപടിയില്ലെന്ന് സി.പി.എം നേതൃത്വം വ്യക്തമാക്കി. രാഘവന്റേത് സ്വാഭാവിക നടപടി മാത്രമാണെന്നാണ് പാര്‍ട്ടി നിലപാട്.
ഇന്നലെ വൈകിയിട്ടാണ് പ്രതിയെ പൊന്നാനി കോടതിയില്‍ ഹാജരാക്കിയത്. ഇയാള്‍ക്കെതിരേ ജാമ്യമില്ലാ വകുപ്പ് പ്രകാരമാണ് കേസ് രജിസ്റ്റര്‍ ചെയ്തിട്ടുള്ളത്. ഞായറാഴ്ച എടപ്പാള്‍ ജങ്ഷനില്‍ പാലക്കാട് റോഡിലുള്ള രാഘവന്റെ കെട്ടിടത്തിന് സമീപമാണ് സംഭവം നടന്നത്. മൂന്ന് സ്ത്രീകളും രണ്ട് പെണ്‍കുട്ടികളുമടങ്ങുന്ന നാടോടി സംഘം ആക്രി സാധനങ്ങള്‍ ശേഖരിക്കുന്നതിനിടെ സ്ഥലത്തെത്തിയ രാഘവന്‍ ഇവരോട് കയര്‍ക്കുകയും സംഘത്തിലുള്ള കുട്ടിയെ മര്‍ദിക്കുകയുമായിരുന്നുവെന്നാണ് കേസ്. നെറ്റിയില്‍ മുറിവേറ്റ കുട്ടിയെ മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച് വിദഗ്ധ ചികിത്സ നല്‍കി.

അതേസമയം നാടോടി ബാലികയെ ആക്രമിച്ച സംഭവത്തില്‍ അറസ്റ്റിലായ സി.പി.എം എടപ്പാള്‍ ഏരിയാ കമ്മിറ്റിയംഗവും മുന്‍ പഞ്ചായത്ത് പ്രസിഡന്റുമായ പ്രതി സി. രാഘവനെതിരേ പാര്‍ട്ടി നടപടി സ്വീകരിക്കാത്തതില്‍ വ്യാപക വിമര്‍ശനമുയര്‍ന്നിട്ടുണ്ട്. പാര്‍ട്ടി നടത്തിയ അന്വേഷണത്തില്‍ പെണ്‍കുട്ടിക്ക് പരുക്കേറ്റത് വീഴ്ചയിലാണെന്നാണ് വിശദീകരണം.