തിരുവനന്തപുരം: ഡി.ജി.പി ആസ്ഥാനത്ത് മഹിജയെ അക്രമിച്ച സംഭവത്തില്‍ മ്യൂസിയം എസ്.ഐ എ. സുനില്‍കുമാര്‍ മനുഷ്യാവകാശ കമ്മിഷന്‍ മുന്‍പാകെ ഹാജരായി മൊഴി നല്‍കി. മഹിജയെ താന്‍ മര്‍ദിച്ചിട്ടില്ലെന്നും വനിതാ പൊലിസാണ് അവരെ മാറ്റിയതെന്നും സുനില്‍കുമാര്‍ രേഖാമൂലം മൊഴി നല്‍കി. ഡി.ജി.പിയെ കാണാന്‍ അവസരമുണ്ടായിട്ടും മഹിജയുടെ കുടുംബം തയാറായില്ല. സമരം നിരോധിച്ച സ്ഥലത്ത് പ്രതിഷേധിച്ചിട്ടും യാതൊരു തരത്തിലുള്ള അക്രമസംഭവങ്ങളുടെ തങ്ങളുടെ ഭാഗത്തുനിന്നുണ്ടായിട്ടില്ലെന്നും സുനില്‍കുമാറിന്റെ മൊഴിയില്‍ പറയുന്നു.
അതിനിടെ സംഭവത്തില്‍ അടിയന്തരമായി റിപ്പോര്‍ട്ട് സമര്‍പ്പിക്കണമെന്ന് ആവശ്യപ്പെട്ട് മനുഷ്യാവകാശ കമ്മിഷന്‍ ഉത്തരവായി. ഡി.ജി.പി ലോക്‌നാഥ് ബെഹ്‌റ, ജില്ലാ പൊലിസ് മേധാവി ജി. സ്പര്‍ജന്‍ കുമാര്‍ എന്നിവരോട് ഏപ്രില്‍ 24നകം റിപ്പോര്‍ട്ട് സമര്‍പ്പിക്കാന്‍ കമ്മിഷന്‍ ആവശ്യപ്പെട്ടിരുന്നു. എന്നാല്‍ കേസ് പരിഗണിക്കുന്നത് അടുത്ത മാസത്തേക്ക് മാറ്റി.