കൂത്തുപറമ്പ്: പതിനേഴുകാരിയായ ആദിവാസി പെണ്‍കുട്ടിയെ പീഡിപ്പിക്കാന്‍ ശ്രമിച്ച സംഭവത്തില്‍ കണ്ണവം പൊലിസ് കേസെടുത്ത് അന്വേഷണം തുടങ്ങി. സി.പി.എം മുന്‍ ബ്രാഞ്ച് സെക്രട്ടറിയും തെയ്യം കലാകാരനുമായ ചെറുവാഞ്ചേരി പൂവത്തൂരിലെ മഹേഷ് പണിക്കര്‍ക്കെതിരേ (42) ആണ് പൊലിസ് പോക്‌സോ വകുപ്പ് പ്രകാരം കേസെടുത്തത്.
തിങ്കളാഴ്ച രാത്രിയായിരുന്നു കേസിനാസ്പദമായ സംഭവം. പെണ്‍കുട്ടിയുടെ വീട്ടില്‍ മുത്തപ്പന്‍ വെള്ളാട്ടം ചടങ്ങ് നടത്തുന്നവരോടൊപ്പം എത്തിയതായിരുന്നു ഇയാള്‍. വീട്ടില്‍വച്ച് ഇയാള്‍ പീഡിപ്പിക്കാന്‍ ശ്രമിച്ചെന്നു കാണിച്ച് പെണ്‍കുട്ടി രക്ഷിതാവിനോടൊപ്പം തിങ്കളാഴ്ച രാത്രി കണ്ണവം സ്റ്റേഷനിലെത്തി പരാതി നല്‍കുകയായിരുന്നു.
അതേസമയം, സംഭവത്തില്‍ രോഷാകുലരായ ഒരുസംഘം ആളുകള്‍ മഹേഷ് പണിക്കരെ കൈയേറ്റം ചെയ്തതായും പരാതിയുണ്ട്. പരുക്കേറ്റ ഇയാളെ തലശ്ശേരി സഹകരണ ആശുപത്രിയില്‍ പ്രവേശിപ്പിച്ചു. നിരീക്ഷണത്തിലുള്ള ഇയാള്‍ ഉടന്‍ അറസ്റ്റിലാകുമെന്നും പൊലിസ് അറിയിച്ചു.