കാക്കനാട്: കനത്തമഴയെ തുടര്‍ന്ന് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് അവധിനല്‍കിയ കലക്ടര്‍ മുഹമ്മദ് വൈ സഫീറുള്ളക്ക് ഫേസ്ബുക്കില്‍ കമന്റുകളുടെ പെരുമഴ. പ്രൊഫഷണല്‍ വിദ്യാലയങ്ങള്‍ക്കടക്കം അവധിയറിയിച്ചുള്ള കലക്ടറുടെ പോസ്റ്റിന് ലൈക്കടിക്കാന്‍ ആളുകള്‍ മത്സരിക്കുകയാണ്. ഇന്നലെ രാവിലെ മുതല്‍ വിദ്യാര്‍ഥികളും മുതിര്‍ന്നവരുമടക്കം തമാശ കലര്‍ന്ന കമന്റുകള്‍ ഇടാന്‍ തുടങ്ങി. 'നാളെയും മഴയാണെങ്കില്‍ നീന്തി സ്‌കൂളില്‍ പോകുമോ', 'യൂണിഫോം ഉണങ്ങിയിട്ടില്ല അതുകൊണ്ട് നാളെയും അവധി വേണം' തുടങ്ങിയ കമന്റുകളാണ് വരുന്നത്. മഴകനത്തതോടെ ഇനിയും അവധി നല്‍കാന്‍ ആവശ്യപ്പെട്ട് നിരവധി അപേക്ഷകളും ഉണ്ട്. സിനിമാ ഡയലോഗുകള്‍ മുതല്‍ അവധിക്കായുള്ള വിലപേശല്‍ വരെയുണ്ട്. മഴ തുടരുന്നതിനാല്‍ ഒരാഴ്ചത്തെ അവധി ചോദിച്ചവരും കൂട്ടത്തിലുണ്ട്.

''ദൈവം കോളജ് പിള്ളേര്‍ക്ക് അവധി കൊടുക്കണമെന്ന് ആഗ്രഹിച്ചു. ദൈവം എറണാകുളം ജില്ലാ കലക്ടറുടെ രൂപത്തില്‍ അവതരിച്ചു'' ''എന്റെ പൊന്നു സാറെ കോതമംഗലത്തു ഒടുക്കത്തെ മഴയാ, അഞ്ച് ദിവസമായി തുടങ്ങിയിട്ട് ഇതുവരെ ഒരു കുറവും ഇല്ല, ഒന്നവധി തരണേ'', ''വളരെ നന്ദിയുണ്ട്..അടുത്ത ദിവസവും മഴയാണെങ്കില്‍ അവധി തരണം'', ''ഇപ്പോ സ്റ്റഡി ലീവ്കിട്ടി ഇരിക്കുന്നവര്‍ക്ക് വേറൊരു ദിവസം അവധി തരുവോ'', ''ഞങ്ങളുടെ തൃശൂര്‍ കലക്ടറോടും അവധിയനുവദിക്കാന്‍ ഒന്നു പറയണേ'', ''നന്ദിയുണ്ട് സാറെ നാളെയും ഇതുപോലെയുള്ള പോസ്റ്റ് പ്രതിക്ഷിക്കുന്നു.'' ''ഞാന്‍ പടിത്തമൊക്കെ കഴിഞ്ഞ് വെറുതെ വീട്ടിലിരിക്കുവാ സാറേ എന്നാലും അവധീന്നൊക്കെ കേട്ടാല്‍ ഒരു സന്തോഷമാണ് സാറേ ... ഒരവധി താ സാറേ'' തുടങ്ങീ തമേശ രൂപേണയുള്ള കമന്റുകളാണ് ഏറെയും.