ബംഗളൂരു: കോണ്‍ഗ്രസ് പുറത്തുവിട്ട അവരുടെ തെരഞ്ഞെടുപ്പ് പ്രകടനപത്രിക രാജ്യത്തിനു സുരക്ഷാഭീഷണി ഉയര്‍ത്തുന്നതാണെന്നും ആ പാര്‍ട്ടിയിലെ ചിലര്‍ക്കു ദേശവിരുദ്ധ ചിന്തയുണ്ടെന്നും പ്രധാനമന്ത്രി നരേന്ദ്രമോദി. കോണ്‍ഗ്രസും പാകിസ്താനും ഭീകരത പ്രചരിപ്പിക്കുന്നവരും രാജ്യത്തെ തകര്‍ക്കണമെന്ന് ആഗ്രഹിക്കുന്നവരുമാണ്. ഭീകരതയെ നേരിടാന്‍ രാജ്യത്തിന് ആവശ്യമായ ശക്തി ലഭിക്കരുതെന്ന് ആഗ്രഹമുള്ളവരാണ് കോണ്‍ഗ്രസും പാകിസ്താനും.
പാകിസ്താന്റെ ഭാഷയിലാണ് കോണ്‍ഗ്രസ് സംസാരിക്കുന്നത്. കോണ്‍ഗ്രസിന്റെ പ്രകടനപത്രികയിലുള്ള കശ്മിരിനു പ്രത്യേക പദവി നല്‍കുന്ന 370ാം വകുപ്പ് നീക്കം ചെയ്യണമെന്ന നിലപാട് തന്നെയാണ് പാകിസ്താനുമുള്ളത്. ഇത്തരം നിലപാടുകള്‍ രാജ്യത്തിന് അപകടം ചെയ്യുമെന്നും മോദി പറഞ്ഞു. കര്‍ണാടകയില്‍ ബി.ജെ.പി റാലിയെ അഭിസംബോധന ചെയ്തു സംസാരിക്കുകയായിരുന്നു മോദി.

അതേസമയം, കള്ളപ്പണം നഷ്ടപ്പെട്ടവരാണ് നോട്ടുനിരോധനം ഏര്‍പ്പെടുത്തിയപ്പോള്‍ നിലവിളിക്കുന്നതെന്ന് ദേശീയമാധ്യമത്തോടുള്ള അഭിമുഖത്തില്‍ മോദി പറഞ്ഞു. കള്ളപ്പണം പുറത്തെടുക്കാന്‍ കഴിയാതെ വന്നതിനാല്‍ പാവപ്പെട്ടവരുടെ വോട്ട് ബാങ്ക് നഷ്ടപ്പെട്ടവരാണ് അവര്‍. അന്ന് പ്രയാസംനേരിട്ടവര്‍ ഇപ്പോഴും ബുദ്ധിമുട്ടിലാണ്. അവര്‍ ഇതുവരെ കരച്ചില്‍ നിര്‍ത്തിയിട്ടില്ല.

നോട്ട്‌നിരോധനത്തെ തുടര്‍ന്ന് ആദ്യത്തെ കുറച്ചുകാലം കഷ്ടപ്പെട്ടവര്‍ ഇപ്പോള്‍ തങ്ങള്‍ക്കൊപ്പമാണുള്ളത്. നോട്ട്‌നിരോധനത്തിനു പിന്നാലെയാണ് 2017ലെ ഉത്തര്‍പ്രദേശ് നിയമസഭാ തെരഞ്ഞെടുപ്പ് നടന്നത്. എന്നാല്‍, ആ തെരഞ്ഞെടുപ്പില്‍ ബി.ജെ.പി ഭൂരിപക്ഷത്തോടെ വിജയിക്കുകയാണുണ്ടായത്. ബി.ജെ.പിയിലും തന്നിലും ജനങ്ങള്‍ക്കുള്ള വിശ്വാസമാണ് ഉത്തര്‍പ്രദേശ് തെരഞ്ഞെടുപ്പില്‍ വന്‍ വിജയത്തിന് കാരണമായതെന്നും അദ്ദേഹം പറഞ്ഞു.