പിലിക്കോട്: ഫിലമെന്റ് ബള്‍ബുകള്‍ പൂര്‍ണമായും ഒഴിവാക്കിയതിനു പിന്നാലെ പിലിക്കോടിനെ സൗരഗ്രാമമാക്കാന്‍ പദ്ധതി. ആദ്യഘട്ടമെന്ന നിലയില്‍ പഞ്ചായത്തിലെ സര്‍ക്കാര്‍ സ്ഥാപനങ്ങളില്‍ സോളാര്‍ സംവിധാനം ഒരുക്കും. അനര്‍ട്ടിന്റെ സാമ്പത്തിക സഹായത്തോടെ 80 ലക്ഷം രൂപ ചെലവില്‍ 130 കിലോ വാട്ട് വൈദ്യുതി ഉല്‍പാദിപ്പിക്കാവുന്ന തരത്തിലാണ് സോളാര്‍ പാനലുകള്‍ സ്ഥാപിക്കുന്നത്.
കുറഞ്ഞ ചെലവില്‍ വീടുകളില്‍ സോളാര്‍ വൈദ്യുതി എത്തിക്കുകയെന്നതാണ് അടുത്ത ഘട്ടം. അഞ്ഞൂറു വീടുകളില്‍ ആദ്യം സൗരോര്‍ജ വൈദ്യുതി ലഭ്യമാക്കും. ഊര്‍ജസംരക്ഷണത്തിനായി എനര്‍ജി മാനേജ്‌മെന്റ് സെന്റര്‍ കേരളയുടെ സഹകരണത്തോടെ നടപ്പാക്കിയ 'ഊര്‍ജയാനം' പദ്ധതിയിലൂടെ ഇന്ത്യയിലെ ആദ്യ ഫിലമെന്റ് രഹിത പഞ്ചായത്ത് എന്ന ബഹുമതി പിലിക്കോട് പഞ്ചായത്ത് സ്വന്തമാക്കിയിരുന്നു.
'സൗരഗ്രാമം' പദ്ധതിയുടെ ഭാഗമായി പടുവളം എസ്.ജി.വൈ.എസ് ഹാളില്‍ ഏകദിന ശില്‍പശാല സംഘടിപ്പിച്ചു. പഞ്ചായത്ത് പ്രസിഡന്റ് ടി.വി ശ്രീധരന്‍ അധ്യക്ഷനായി. അനര്‍ട്ട് സ്റ്റേറ്റ് പ്രോഗ്രാം ഓഫിസര്‍മാരായ സി.കെ ചന്ദ്രബോസ്, അനീഷ് എസ്. പ്രസാദ്, കെ.എസ്.ഇ.ബി യിലെ പി.വി മധുസൂദനന്‍ ക്ലാസെടുത്തു. എം. കുഞ്ഞിരാമന്‍, എം.കെ ഹരിദാസ് സംസാരിച്ചു.