മദീന: ഹജ്ജിനെത്തുന്ന മലയാളികളടക്കമുള്ള ഇന്ത്യക്കാരെ സ്വീകരിക്കാനും സേവിക്കാനുമായി പ്രവാചക നഗരിയിലെ മലയാളി സമൂഹം സജ്ജമായി. ഈ മാസം 14 മുതല്‍ ഇവിടെയെത്തുന്ന ഇന്ത്യക്കാര്‍ക്കായി മുഴുസമയവും സേവന നിരതരാകാന്‍ കര്‍മപദ്ധതികളുമായാണ് മദീനയിലെ വിവിധ മലയാളി സംഘടനകള്‍ തനിച്ചും ഹജ്ജ് വെല്‍ഫെയര്‍ ഫോറത്തിന്റെ കീഴിലും സേവന രംഗത്തിറങ്ങുന്നത്. മുന്‍ വര്‍ഷങ്ങളില്‍ നിന്ന് വ്യത്യസ്തമായി ഹജ്ജ് സേവന രംഗത്തെ പ്രബലരായ ചില സംഘടനകള്‍ ഈ വര്‍ഷം സ്വന്തമായാണ് രംഗത്തിറങ്ങുന്നത്. ഇന്ത്യന്‍ ഹാജിമാര്‍ക്കും പ്രത്യേകിച്ച് മലയാളി ഹാജിമാര്‍ക്കും പ്രഥമ പരിഗണന നല്‍കിയാണ് ഈ വര്‍ഷവും പ്രവാചക പള്ളിയും പരിസരവും കേന്ദ്രീകരിച്ച് ഹജ്ജ് വെല്‍ഫെയര്‍ ഫോറത്തിന്റെ കീഴിലും പുറത്തുള്ള വിവിധ സംഘടനകളുടെ പ്രവര്‍ത്തകര്‍ രംഗത്തിറങ്ങുക.
വഴി തെറ്റിയ ഹാജിമാരെ കൃത്യമായ കേന്ദ്രങ്ങളില്‍ എത്തിക്കുക. മെഡിക്കല്‍ സഹായംആവശ്യമുള്ളവര്‍ക്ക് യഥാസമയം അവ നല്‍കുക തുടങ്ങിയവയാണ് സംഘം ചെയ്യുക. ജോലികള്‍ക്കിടയിലും മറ്റും ലഭിക്കുന്ന ഒഴിവു സമയങ്ങള്‍ ഉപയോഗപ്പെടുത്തി മലയാളി യുവാക്കള്‍ ചെയ്യുന്ന സേവനം ഏവര്‍ക്കും മാതൃകാപരമാണ്.