ന്യൂഡല്‍ഹി: പൊതുതെരഞ്ഞെടുപ്പിനു മുന്നോടിയായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മുസ്‌ലിം സാംസ്‌കാരിക, സാമൂഹിക പ്രവര്‍ത്തകരുമായി കൂടിക്കാഴ്ച നടത്തുന്നു.
വിവിധ രാഷ്ട്രീയ, മത, സാംസ്‌കാരിക, കായിക രംഗത്തുള്ളവരെ ബി.ജെ.പി അധ്യക്ഷന്‍ അമിത്ഷാ സന്ദര്‍ശിച്ചുവരുന്നതിനിടെയാണ് സമാനമായി വിവിധ തലത്തിലുള്ളവരെ കാണാന്‍ കോണ്‍ഗ്രസ് അധ്യക്ഷനും നീക്കം നടത്തുന്നത്. ഇതിന്റെ ഭാഗമായി 20ഓളം മുസ്‌ലിം പ്രമുഖരുമായി രാഹുല്‍ കൂടിക്കാഴ്ച നടത്തും.
ചലച്ചിത്ര പ്രവര്‍ത്തകന്‍ ജാവേദ് അക്തര്‍, നടി സബാനാ ആസ്മി, വിദ്യാഭ്യാസ വിദഗ്ധ സോയ ഹസന്‍, സാമൂഹിക പ്രവര്‍ത്തക ശബ്‌നം ഹാശ്മി, ആസൂത്രണ ബോര്‍ഡ് മുന്‍ അംഗങ്ങളായ സയ്യിദ് സഫര്‍ മഹ്മൂദ്, സെയ്ദാ ഹമീദ് ഉള്‍പ്പെടെയുള്ളവരെ നേരില്‍ കാണും. ഇവരില്‍ ചിലരുമായി ഇന്നലെ വൈകിട്ടോടെ ഡല്‍ഹിയിലെ ഔദ്യോഗിക വസതിയില്‍ രാഹുല്‍ കൂടിക്കാഴ്ച നടത്തി.
അതേസമയം, മുസ്‌ലിം നേതാക്കളുമായി രാഹുല്‍ ചര്‍ച്ച നടത്തുന്നില്ലെന്നും പുരോഗമന, സാമൂഹിക, സാംസ്‌കാരിക, ബുദ്ധിജീവി തലത്തിലുള്ളവരുമായി മാത്രമാണ് കൂടിക്കാഴ്ചയെന്നും പാര്‍ട്ടി വൃത്തങ്ങള്‍ അറിയിച്ചു.