ഗുരുവായൂര്‍: പുതൂര്‍ ഉണ്ണികൃഷ്ണന് ഗുരുവായൂരില്‍ ഉചിതമായ സ്മാരകമുണ്ടാകണമെന്ന് പി.എസ്.സി ചെയര്‍മാന്‍ ഡോ. കെ.എസ് രാധാകൃഷ്ണന്‍ പറഞ്ഞു. പുതൂരിന്റെ 83-ാം ജന്മവാര്‍ഷിക അനുസ്മരണയോഗം ഉദ്ഘാടനം ചെയ്യുകയായിരുന്നു അദ്ദേഹം. വേണ്ടത്ര അംഗീകാരം ലഭിക്കാതെ തമസ്‌കരിക്കപ്പെട്ട എഴുത്തുകാരനാണ് ഉണ്ണികൃഷ്ണന്‍ പുതൂരെന്നും ഈ തമസ്‌കരണം രാഷ്ട്രീയ-സാമൂഹ്യരംഗത്ത് മുന്‍കാലങ്ങളിലും മലയാളികള്‍ തുടര്‍ന്നിട്ടുണ്ട്.
പൊയ്മുഖങ്ങളുള്ള എഴുത്തുകാര്‍ക്കിടയില്‍ കാപട്യശീലമില്ലാത്ത ഈ എഴുത്തുകാരന് സാഹിത്യത്തില്‍ ഒരുപാട് ശത്രുക്കളുണ്ടായിരുന്നു. തനിക്ക് അധര്‍മമെന്ന് തോന്നുന്നത് വെട്ടിത്തുറന്ന് പറഞ്ഞ എഴുത്തുകാരനായിരുന്നു ഉണ്ണികൃഷ്ണന്‍ പുതൂരെന്ന് ഡോ. കെ.എസ്. രാധാകൃഷ്ണന്‍ കൂട്ടിച്ചേര്‍ത്തു. 'പുതൂര്‍ വ്യക്തിയും സാഹിത്യവും' എന്ന പുസ്തകം ടി.വി. ചന്ദ്രമോഹന് നല്‍കി പ്രകാശനം ചെയ്തു.
നഗരസഭ വൈസ് ചെയര്‍മാന്‍ കെ.പി. വിനോദ് അധ്യക്ഷനായി. ഷാജു പുതൂര്‍ സ്വാഗതവും ജനു ഗുരുവായൂര്‍ നന്ദിയും പറഞ്ഞു.
ശ്രീകൃഷ്ണ ഹയര്‍ സെക്കന്‍ഡറി സ്‌കൂള്‍, ചാവക്കാട് ഗവ, ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളില്‍ നിന്നും എസ്.എസ്.എല്‍.സി പരീക്ഷയില്‍ മലയാളത്തില്‍ സമ്പൂര്‍ണവിജയം നേടിയ വിദ്യാര്‍ഥികളെ ചടങ്ങില്‍ ആദരിച്ചു.