കൊപ്പം (പാലക്കാട്): ഹയര്‍ സെക്കന്‍ഡറി പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് നേടി അതിഥി തൊഴിലാളിയുടെ മകന്‍. എടപ്പലം പി.ടി.എം.വൈ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിയും ബംഗാള്‍ നേദിയ സ്വദേശികളായ ശുക്രജന്‍ റായ്-കാഞ്ചല റായ് ദമ്പതികളുടെ മകനുമായ ബാപ്പി റായിയാണ് സയന്‍സ് വിഭാഗത്തില്‍ മിന്നും ജയം സ്വന്തമാക്കിയത്. എസ്.എസ്.എല്‍.സി പരീക്ഷയിലും ബാപ്പി റായിക്ക് ഫുള്‍ എ പ്ലസ് ഉണ്ടായിരുന്നു. എട്ടാം ക്ലാസ് മുതല്‍ ബാപ്പി റായ് എടപ്പലം ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥിയാണ്.
കെട്ടിട നിര്‍മാണ തൊഴിലാളിയാണ് ബാപ്പി റായിയുടെ അച്ഛന്‍. 18 വര്‍ഷങ്ങള്‍ക്ക് മുന്‍പാണ് പാലക്കാട് ജില്ലയിലെ തിരുവേഗപ്പുറയില്‍ ശുക്രജന്‍ റായ് എത്തിയത്. പ്രാഥമിക തലം മുതല്‍ എല്ലാ ക്ലാസിലും ബാപ്പി റായിക്ക് ഉയര്‍ന്ന മാര്‍ക്ക് ലഭിച്ചിരുന്നു. പാഠ്യ-പാഠ്യേതര വിഷയങ്ങളിലും മിടുക്കനാണ്.