നെടുങ്കണ്ടം: വീട്ടിനകത്ത് അതിക്രമിച്ചുകയറി വീട്ടമ്മയെ കത്തികാട്ടി ഭീഷണിപ്പെടുത്തി അപമാനിച്ച കേസില്‍ യുവാവ് അറസ്റ്റില്‍.  മൊട്ടയെന്ന് വിളിക്കുന്ന മാവടി മുളകുപാടം മുരുകേശന്‍(26)നെയാണ് നെടുങ്കണ്ടം പൊലിസ്  അറസ്റ്റ് ചെയ്തത്. കഴിഞ്ഞദിവസം രാത്രി മാവടിയിലാണ് കേസിനാസ്പദമായ സംഭവം. കഴിഞ്ഞ ദിവസം രാത്രി മാവടി സ്വദേശിനിയുടെ വീട്ടിലെത്തിയ പ്രതി വീട്ടമ്മയെ കടന്ന് പിടിക്കാന്‍ ശ്രമിച്ചിരുന്നു. വീട്ടമ്മയക്ക് നേരെ വാക്കത്തി വീശിയാണ് പ്രതി അതിക്രമം നടത്തിയത്.
അംഗപരിമിതിയുള്ള ഭര്‍ത്താവും മക്കളും സ്ഥലത്തുള്ളപ്പോഴാണ് വീട്ടിനുള്ളില്‍ പ്രതി അക്രമം അഴിച്ചുവിട്ടത്. പ്രതിയുടെ ബന്ധുവാണ് വീട്ടമ്മ. മുരുകേശന്‍ നിരന്തരമായി വീട്ടമ്മയെ ശല്യപ്പെടുത്തിയിരുന്നു. ഇതേതുടര്‍ന്ന് നെടുങ്കണ്ടം പൊലിസ് സ്‌റ്റേഷനില്‍ വീട്ടമ്മ പരാതി നല്‍കി.
പൊലിസില്‍ പരാതി നല്‍കിയതിനെതിരേ ഭീഷണിയുമായാണ് പ്രതി വീട്ടമ്മയുടെ അടുക്കലെത്തിയത്. മുരുകേശനെതിരേ കോടതിയില്‍ നിന്നും മറ്റൊരു കേസില്‍ വാറന്റുമുണ്ടായിരുന്നതിനാല്‍ പൊലിസ് അന്വേഷിച്ച് വരികയായിരുന്നു. കോടതിയില്‍ ഹാജരാക്കിയ പ്രതിയെ  റിമാന്‍ഡ് ചെയ്തു.  നെടുങ്കണ്ടം എസ്.ഐ പി.ടി ബിജോയി, സി.പി.ഒമാരായ മനോജ്, ജയേഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.