മാള: കുഴിക്കാട്ടുശ്ശേരി ഗ്രാമിക സംഘടിപ്പിക്കുന്ന കലാ സാംസ്‌കാരികോത്സവമായ ദേശക്കാഴ്ചക്ക് കൊടിയേറി. ദേശക്കാഴ്ചക്ക് മുന്നോടിയായി നടക്കുന്ന വേനല്‍മഴ നാടക പരിശീലന കളരിയിലെ പ്രായം കുറഞ്ഞ അംഗങ്ങളായ സി.യു അഞ്ജലി, പി.എസ് ബാല, കെ.പി ഹൃഷികേശ് എന്നീ കുട്ടികള്‍ ചേര്‍ന്നാണ് കൊടിയേറ്റ കര്‍മ്മം നിര്‍വ്വഹിച്ചത്. നാടക കളരിയിലേയും ചിത്രകലാ ക്യാമ്പിലേയും കുട്ടികളേയും നാട്ടുകാരേയും സാക്ഷിനിര്‍ത്തിയാണ് ചെറിയ കുട്ടികളായ മൂന്നു പേരും ചേര്‍ന്ന് കൊടിയേറ്റകര്‍മ്മം നിര്‍വ്വഹിച്ചത്. ഗ്രാമപഞ്ചായത്തംഗങ്ങളായ അജിത സുബ്രഹ്മണ്യന്‍, അംബിക ശിവദാസന്‍, ഗ്രാമിക പ്രസിഡന്റ് ഡോ.വടക്കേടത്ത് പത്മനാഭന്‍, സെക്രട്ടറി പി.കെ കിട്ടന്‍, നാടക പ്രവര്‍ത്തകനായ ജിനേഷ് ആമ്പല്ലൂര്‍, കെ.കെ സുബ്രഹ്മണ്യന്‍ തുടങ്ങിയവര്‍ നേതൃത്വം നല്‍കി. ഈ മാസം 29, 30, മെയ് 1, 2 തിയ്യതികളിലായാണ് ദേശക്കാഴ്ചയുടെ മുഖ്യപരിപാടികള്‍ നടക്കുന്നത്.