മാനന്തവാടി: നാടന്‍ തോക്കുള്‍പ്പെടെയുള്ള ആയുധങ്ങളുമായി അഞ്ചംഗ നായാട്ടു സംഘത്തെ തിരുനെല്ലി പൊലിസ് പിടികൂടി.
ഓലഞ്ചേരി ഒ.കെ അനീഷ് (27), ഓലഞ്ചേരി ഇ.എഫ് സുജേഷ് (26), വാളാട് ബിനു ചുള്ളിയില്‍ (28), പ്ലാമൂല ഇ.ആര്‍ അനീഷ് (22), മുള്ളന്‍കൊല്ലി ബിനീഷ് (26) എന്നിവരാണ് അറസ്റ്റിലായത്. മുള്ളന്‍കൊല്ലി സ്വദേശി സുനില്‍ ഓടി രക്ഷപ്പെട്ടു.
ഇവരുടെ കൈവശം നിന്നും നാടന്‍ തോക്ക്, തിര നിറയ്ക്കാനുള്ള വെടിമരുന്ന്, കത്തികള്‍, മറ്റ് നായാട്ട് ഉപകരണങ്ങള്‍ എന്നിവയും പിടികൂടിയിട്ടുണ്ട്. തിരുനെല്ലി പൊലിസ് സ്റ്റേഷന്‍ പരിധിയിലെ വെള്ളാഞ്ചേരിയില്‍ വെച്ച് ചൊവ്വാഴ്ച പുലര്‍ച്ചെ നടത്തിയ വാഹന പരിശോധനയിലാണ് സംഘം പിടിയിലായത്.തിരുനെല്ലി എസ്.ഐ രജീഷ് തെരുവത്ത് പീടികയില്‍, എ.എസ്.ഐ അബ്ദുല്ല, സി.പി.ഒമാരായ അലക്‌സ് ബെന്‍, വിനയ് ശങ്കര്‍, ലിന്‍സ് എന്നിവരടങ്ങുന്ന സംഘമാണ് നായാട്ട് സംഘത്തെ പിടികൂടിയത്.